टिपरले मोटरसाइकललाई ठक्कर दिँदा महिलाको मृत्यु

कर्णाली– टिपरको ठक्करबाट सुर्खेतको छिन्चुमा एक महिलाको मृत्यु भएको छ। वीरेन्द्रनगरबाट नेपालगञ्ज जाँदै गरेको मोटरसाइकललाई सोही दिशातर्फ जाँदै गरेको टिपरले ठक्कर दिँदा वीरेन्द्रनगर–११ की २३ वर्षीय ताराकुमारी आलेको मृत्यु भएको हो।

जिल्ला प्रहरी कार्यालयका अनुसार कर्णाली प्रदेश ००१ क ००९९ नम्बरको टिपरले भे ७ प ५२०६ नम्बरको मोटरलाइकललाई छिञ्चु बजारको पेट्रोल पम्प अगाडि ठक्कर दिएको थियो।

जिल्ला प्रहरी कार्यालयका प्रवक्ता प्रहरी नायब उपरीक्षक रामप्रसाद घर्तीका अनुसार मोटरसाइकल चालक शुभकालिका गाउँपालिका कालिकोटका २६ वर्षीय दुर्गा शाही गम्भिर घाइते भएका छन्। मोटरसाइकलको पछाडि बसेकी ताराकुमारीको उपचारका लागि लैजाँदै गर्दा बाटोमै मृत्यु भएको  घर्तीले जानकारी दिए।

घाइते शाहीको उपचार भइरहेको छ भने टिपरसहित चालकलाई प्रहरीले नियन्त्रणमा लिएको छ।