चोट घरि घरि

माग्न आउँछन् आगनमा भोट घरि घरि।।
बिटा बनाइ कुम्ल्याउन नोट घरि घरि।।

छिर्के हाल्दै पछारेर दौडिए आफू किन
भिर्नलाई दौरा सरुवाल कोट घरि घरि।।

धीत मारे रस चुसि मिठा फलका खुबै
निमोठ्दै चुँडी फाले बोट घरि घरि।।

दाग छोप्न तालुको छड्के टोपी लाउने
जति छोप टल्किन्छ खोट घरि घरि।।

बिर्ता बपौती तुल्याउछन् दपोट गरि गरि
केरमेट गरि  फाले मोठ घरि घरि।।

खाए होलान् कति मिठा डाडु पन्यौ हुँदा
सपनामै चाट्न थाले ओठ घरि घरि।।

इमान्दार छानौँ भन्दा झुक्काइ हाल्ने फेरि
पटके हुन्छन् आखिर छनौट घरि घरि।।

खुइलियो काँध सबै बोकि बोकि तिन्लाइ
त्यहि काँधले पाउँछ चोट घरि घरि।।