राति भयो आज

फुट्ने जुट्ने ठेगान पनि थाती भयो आज
एउटै थालमा मुख चोब्ने घाती भयो आज।।

डाक्टर झाँक्री सबै लागे व्यथा खुट्याउन
जिउमा आको लुतोफोका जाती भयो आज।।

बत्ति बाल मुलुक भरि ल्यायौँ हामीले भन्दा
दियो फुक्दै लेखोट पोल्ने साथी भयो आज।।

ह्याकुल्लो पिटि कुर्लिन्थे ढ्वाङ फुक्दा खेरि
फित्ताले नाप्दा भँगेराको छाती भयो आज।।

खान पाउँदा दुइटै हातले सोहोरि भरे थैली
हात पुछि दौरा सुरुवाल काती भयो आज।।

नभरेको बन्दुक पड्क्यो गोरु पनि व्यायो
टेबुलको मुङ्ग्रो ठोकाइ माथि भयो आज।।

पुत्ला भुत्ला अधिक जले हुन्थे एकै खालका
नयाँ रुपका पुत्ला बाल्ने ताँती भयो आज।।

जस्का खातिर नयाँ तन्त्र उस्ले पार्‍यो कुम्लो
गाउँघर जाँदा काला ध्वजा पाती भयो आज।।

नजर थियो डाँडा माथि जिल्ल पर्‍यो ‘बिष्णु’
घाम नडुब्दै दिउँसै किन राति भयो आज।।