अष्टलक्ष्मीको पछुतो – हामी गुटबन्दीको सिकार भयौँ, विगतका कमजोरी ढाकछोप नगरौँ

काठमाडौं । नेकपा एमाले उपाध्यक्ष एवं बाग्मतीका मुख्यमन्त्री अष्टलक्ष्मी शाक्यले आफूहरु गुटबन्दीको सिकार भएको निष्कर्ष सुनाएकी छन् ।

एमालेले बिहीबार  काठमाडौंमा आयोजना गरेको वृहत् कार्यकर्ता भेलामा उनले प्यानलमा अब चुनाव गर्न नहुने निष्कर्ष सुनाएकी छन् ।

उनले भनिन, ‘हामीले प्यानलमा चुनाव लडेपछि नै गुटबन्दी सुरु भएको हो । हामी गुटबन्दीको सिकार भयौँ । विचारहरु मर्दै गयो । अब विगतका कमीकमजोरी ढाकछोप गर्न हुन्न । यसबारे निर्मम समीक्षा गर्ने हो । नत्र भने फेरि पनि अप्ठ्याराेमा परिनेछ ।’

उनले नेतासँगै कार्यकर्ता रुपान्तरित हुनुपर्ने बताएकी छन् । अबको चुनावमा जनतासँग माफी माग्नुपर्ने अवस्था आएको उनले बताइन् ।

उनले भनिन, ‘अब हामीले विचारको राजनीति गरौँ। हामी गालीगलौजको राजनीति नगरौँ।’

उनले विधान र महाधिवेशनलाई व्यवस्थित र पारदर्शी बनाउन आग्रहसमेत गरिन्।