लुच्चा भए अब

चेप्टिएका नाक समेत चुच्चा भए अब
बाँडिचुँडी खाउँला भन्थे छुच्चा भए अब।।

बिहानको छायादेखि आफै अग्ला ठाने
इन्च फुट लगाइ नाप्दा फुच्चा भए अब।।

ठाउँमा हुँदा वरिपरि घेरा लाउँथे लठैत
आखिर पुच्छर चुँडिएर बुच्चा भए अब।।

जता ततै दाउ हेर्थे नजर घुमाइ घुमाइ
आँखा पनि टल्किएका गुच्चा भए अब।।

कोही बेलामा धाप मार्दा खुबै खुशी हुन्थे
आज च्वास्स छुँदा पनि घुच्चा भए अब।।

बकुल्ला झैँ ढुकी बसे मौका आउँछ भनी
अरुको भाग तानी खाने लुच्चा भए अब।।