युक्रेनका राष्ट्रपति भोलोडिमिर जेलेन्स्कीले फेरि पनि आफ्नो देशमाथिको आकाशलाई ‘नो–फ्लाइ जोन’ (उडान प्रतिबन्धित क्षेत्र) घोषित गर्न माग गरेका छन् ।
जेलेन्स्कीले आफ्नो नियमित भिडियो सम्बोधनको क्रममा स्थानीय समय अनुसार आइतबार राति उडान प्रतिबन्धित क्षेत्र घोषणा गर्न अपिल गरेका हुन् ।
उनले पश्चिमा देशको सैन्य गठबन्धन नेटोसँग युक्रेनको आकाशलाई उडान प्रतिबन्धित क्षेत्र नो–फ्लाइ जोन बनाउन आग्रह गरेका हुन् । उनले यसअघि पनि उडान प्रतिबन्धित क्षेत्र घोषित गर्न माग गर्दै आएका थिए ।
उनले आइतबार राति भिडियो सम्बोधनमा भनेका छन्, ‘यदी तिमिहरु (नेटो) ले हाम्रो आकाश बन्द गरेनौ भने रुसी रकेट हाम्रो भूमिका खस्न केही समय मात्रै लाग्ने छ । नेटोको क्षेत्रमा पनि रुसी रकेट खस्ने छ।’
रुसले आइतबार युक्रेनको योभोरिभमा रहेको सैन्य तालिमक केन्द्रलाई निशाना बनाएर मिसाइल आक्रमण गरेको थियो । सो आक्रमणमा कम्तीमा ३५ जनाको मृत्यु भएको र अरु १३४ जना घाइते भएको अधिकारीहरुले बताएका छन् । नेटो सदस्य राष्ट्र पोल्याण्डबाट मात्रै २५ किलोमिटरको दूरीमा रहेको सैन्य तालिमक केन्द्रलाई रुसले निशाना बनाएको हो ।
रुसले जारी युद्धमा हवाई आक्रमण, मिसाइ तथा रकेटलाई प्रमुख हतियारका रुपमा प्रयोग गरिरहेको र त्यसले सर्वसाधारण तथा सार्वजनिक सम्पति निशाना बन्ने गरेकाले नो–फ्लाई जोन घोषित गर्न जेलेन्स्कीले माग गर्दै आएका हुन् ।
युक्रेनी राष्ट्रपति भोलोडिमिर जेलेन्स्की । तस्बिर : जेलेन्स्कीको फेसबुक
तर नेटोको प्रमुख घटक अमेरिकाले युक्रेनको आग्रह अनुसार नो–फ्लाइ जोन घोषित नगरिने बताउँदै आएको छ । युक्रेनको आकाशलाई उडान प्रतिबन्धित क्षेत्र घोषित गरेमा त्यसले युद्धलाई थप बढाउने अमेरिकी भनाई छ ।
यस्तै नो–फ्लाइ जोन घोषित गरेपछि युक्रेनको आकाशमाथि रुसी विमान उडेमा नेटोले खसाल्नु पर्ने हुन्छ, त्यसो गर्नु भनेको युद्धमा नेटो सामेल हुने अवस्था हो । सोही कारण नेटोले युक्रेनको माग अस्वीकार गर्दै आएको छ ।
रुसी राष्ट्रपति भ्लादिमिर पुटिनले आर्थिक प्रतिबन्धलाई नै पश्चिमा देशको युक्रेन युद्धमा संलग्नता भनेका छन् । यदि उडान प्रतिबन्धित क्षेत्र घोषित गरेमा परिणाम राम्रो नहुने चेतावनी उनको छ ।
तर जेलेन्स्कीले भने सर्वसाधारणको जीवन रक्षाका लागि उडान प्रतिबन्ध बाहेकको अर्को विकल्प नदेखिएको बताएका छन् ।
उडान प्रतिबन्धित क्षेत्र भन्नुको अर्थ युक्रेनको आकाशमाथिबाट कुनै पनि विमान वा मिसाइल, रकेट उडान नपाउनु हो । पूर्ण रुपमा युक्रेनमाथिको आकाशलाई हवाई गतिविधि मुक्त बनाउनु हो ।
युक्रेनमा रुसले गएको फेब्रुअरी २४ देखि आक्रमण गर्दै आएको छ र उसले हवाई आक्रमण, गोलाबारी, मिसाइललाई प्रमुख हतियार बनाएको छ ।
भर्खरै
लोकप्रिय
