काठमाडौँ – ललितपुर महानगरपालिकमा हालसम्म नौ वटा वडाको मतगणना हुँदा पाँच वडाको वडाध्यक्षमा नेपाली कांग्रेसका उम्मेदवार विजयी भएका छन्।
नेकपा एकीकृत समाजवादीले दुई र नेकपा एमालेले एक र एक स्वतन्त्र उम्मेदवार विजयी भएका हुन्।
नेपाली कांग्रेसबाट वडा नं ४ मा सन्तोष खड्का, वडा नं ६ मा रुपेन्द्रराज शाक्य, वडा नं ७ मा कुलबहादुर महर्जन वडा नं ८ मा बाबुरत्न महर्जन र वडा नं १० मा रवीन व्यञ्जनकार विजयी भएका छन्।
वडा नं २ मा नेकपा एकीकृत समाजवादीका राजेशकुमार महर्जन र ३ मा श्रीगोपाल महर्जन विजयी भएका छन्।
वडा नं १ मा स्वतन्त्र उम्मेदवार निर्मल तण्डुकार र वडा नं ५ मा एमालेका विकासमान श्रेष्ठ विजयी भएका छन्। हाल वडा नं ९, ११ र १२ को गणना जारी छ।
वडा नं १० मा यसअघि १० पटकसम्म सोही स्थानबाट विजयी हुनुभएका स्वतन्त्र उम्मेदवार नरसिंह व्यञ्जनकार पराजित भएका छन्।
रविनले ८२५ मत ल्याएका छन् भने निकटम प्रतिस्पर्धी नरसिंहले ५७८ मत पाएका छन्। महानगरमा २९ वडा रहेकामा हालसम्म नौ वडाको मात्रै परिणाम आएको छ।
शुक्रबार मतदान भएपछि शनिबारदेखि मतगणना सुरु भएको थियो। सुरुमा एक ठाउँमा मात्रै गणना भएकामा हाल तीन वडाको एकै पटक गणना भइरहेको छ। अन्तिम मतपरिणाम आउन अझै केही दिन लाग्ने देखिएको छ।
महानगर प्रमुखमा नेपाली कांग्रेसका उम्मेदवार चिरीबाबु महर्जन र उपप्रमुखमा नेकपा एमालेकी मञ्जली शाक्यको अग्रता कायम रहेको छ।
पछिल्लो विवरणअनुसार नेपाली कांग्रेसका उम्मेदवार महर्जनले १७ हजार ७ सय र नेकपा एमालेका हरिकृष्ण व्यञ्जनकारले नौ हजार ५४४ मत प्राप्त गरेका छन्।
उपप्रमुखमा एमालेकी उम्मेदवार मञ्जली शाक्यले नौ हजार ६६६ मत र नेकपा माओवादीका बाबुराजा बज्राचार्यले छ हजार २८ मत पाएका छन्।
भर्खरै
लोकप्रिय
