काठमाडौँ – काठमाडौँ महानगरपालिकाले हराएको टुकुचा खोला खोज्ने अभियानलाई निरन्तरता दिने भएको छ । शनिबारदेखि खोलामाथि बनाइएका थप संरचना भत्काउने तयारी भइरहेको महानगरपालिकाले जनाएको छ ।
इच्छुमतिका रुपमा पनि चिनिले टुकुचा खोलाका सम्बन्धमा शहरी विकास मन्त्रालय अन्तर्गत अधिकार सम्पन्न बागमती सभ्यता एकीकृत विकास समितिले गरेको अध्ययनलाई आधार मानेर महानगरले संरचनाहरु टाएर खोलाको बाटो प्राकृतिक बनाउनका लागि काम सुरु गरेको हो ।
महानगरपालिकाले बिहीबार यसको सुरुवात जय नेपाल हलको परिस/मा डोजरको सहायताले खनेर खोला निकालेको थियो । शनिबारदेखि महानगरले खोलामाथि बनेका संरचना हटाउने क्रम जारी राख्ने भएको हो ।
टुकुचाको संरचना मिचेर बनाइएका ५८० भन्दा बढी कित्ता जग्गामा बनेका संरचना हटाएर खोलाको करिडोर कायम गर्ने तयारी महानगरको छ ।
महानगरको वडा नम्बर १ को नैना कुमारी देवी राणाको नाममा रहेको कित्ता नम्बर ११ तथा त्यसअघि धनी नखुलेका कित्ता नम्बर ७ को जग्गादेखि वडा नम्बर ३२ को केसम सिम्खडाको नाममा रहेको कित्ता नम्बर ३१७७ तथा नजमा बानुको नाममा रहेको कित्ता नम्बर ३३२२ सम्मका जग्गामा बनेका संरचनाले टुकुचा मिचेका छन् ।
टुकुचा खोलामा पाँच किलोमिटर लामो बहाव छ । यसको चौडाइ मुहान क्षेत्रमा तीन मिटरदेखि बहाव बढ्दै जाँदा ८ मिटरसम्म पुगेको छ ।
खोलाको बाटो खोजिसकेपछि दुवै तर्फ नदी करिडोर बनाउने तथा सार्वजनिक पार्क र सार्वजनिक शौचालयसँगै साइकल लेनसम्म बनाउने योजना रहेको छ ।
भर्खरै
लोकप्रिय
