भारतको उत्तर प्रदेशस्थित प्रयागराजमा जारी महाकुम्भमा मुख्यमन्त्री आदित्यनाथसँगै भुटानी राजा जिग्मे खेसर नामग्याल वांगचुकले पनि संगमस्थलमा डुबुल्की लगाएका छन्। भुटानी नरेशले गंगा पूजा र आरती गरेका थिए। त्यसपछि अक्षयबटधाम तथा लेटे हनुमानको पनि दर्शन तथा पूजा गरेका थिए।
योगी आदित्यनाथ भुटानी राजालाई लिएर लखनउबाट विमानमा बमरौली एयरपोर्ट पुगेका थिए। त्यहाँबाट सडकमार्ग हुँदै कुम्भमा स्नान गर्न पुगेका हुन्। अरैलीले घाटबाट बोटमा सवार भएर संगम पुगेर डुबुल्की लगाएको भारतीय सञ्चारमाध्यामले जनाएका छन्।
योगी तथा भुटानका राजाको आगमनसँगै हनुमान मन्दिर तथा अक्षयबटमा श्रद्धालुहरुका लागि ढोका बन्द गरिएको थियो। साँझ ४ बजेपछि श्रद्धालुका लागि उक्त स्थान खोलिने कार्यतालिका रहेको छ।
५ फेब्रुअरीमा भारतीय प्रधानमन्त्री नरेन्द्र मोदी महाकुम्भमा जाने कार्यतालिका रहेको छ। मोदीको आगमनलाई ध्यानमा राख्दै योगीले हेलिप्याडदेखि अरैलीघाटदेखि संगमस्थल सम्मको व्यवस्थापन हेरिरहेका छन्।
महाकुम्भको आज २३ औँ दिन हो। अहिलेसम्म ३७ करोड मानिसहरुले डुबुल्की लगाएको जनाइएको छ। आज बिहान १० बजेदेखि ४२ लाख बढीले स्नान गरिसकेका छन्। सोमबार अर्थात वसन्त पञ्चमीका दिन करिब २.३३ करोडले स्नान गरेको भारतीय सञ्चार माध्यामले जनाएका छन्।
भर्खरै
लोकप्रिय
