अर्घाखाँचीमा जीप दुर्घटना, दुई जनाको मृत्यु

अर्घाखाँची- दाङ-अर्घाखाँची सडकखण्डमा आज बिहान जीप दुर्घटना हुँदा दुई जनाको मृत्यु भएको छ।

सन्धिखर्कबाट गुल्मीको मदानेतर्फ जाँदै गरेको लु १ ज ४७२४ नम्बरको जीप बिहान करिब साढे ३ बजे सन्धिखर्क नगरपालिका- ९ टारीमा दुर्घटनाग्रस्त भएको हो।

जिल्ला प्रहरी कार्यालय अर्घाखाँचीका सूचना अधिकारी इन्सपेक्टर झलक शर्माका अनुसार गुल्मी घर भएकी १० वर्षीया अरुणा थापा र १३ वर्षीय नारायण पौडेलको घटनास्थलमै मृत्यु भएको छ।

दुर्घटनामा गम्भीर घाइते भएका दुईजनालाई उपचारका लागि बुटवल पठाइएको छ भने अन्य घाइतेहरूको उपचार अर्घाखाँची जिल्ला अस्पताल, सन्धिखर्कमै भइरहेको प्रहरीले जनाएको छ।