काठमाडौँ – भारतस्थित पवित्र तीर्थस्थल गङ्गोत्रीको जल पशुपतिनाथ मन्दिरमा अर्पण गरिएको छ ।
काजी अमरसिंह थापाले नेपाल विजय गर्ने क्रममा गढवाल क्षेत्र कब्जामा लिएपछि गङ्गोत्री नेपालको अधीनमा आएको थियो ।
थापाले त्यसैबेलादेखि गङ्गोत्रीको जल पशुपतिनाथ मन्दिरमा चढाउन सुरु गराएको ऐतिहासिक दस्तावेज प्राप्त भएको पशुपति क्षेत्र विकास कोषका कार्यकारी निर्देशक रमेशकुमार उप्रेतीले जानकारी दिए ।
कार्तिक कृष्ण औँसी अर्थात् लक्ष्मीपूजाका दिन हिउँ परी चिसो बढ्ने भएकाले गङ्गोत्रीको ढोका बन्द हुन्छ । ढोका बन्द हुनुअघिको जल पशुपतिनाथ मन्दिरमा चढाउने परम्परा अमरसिंह थापाकै पालादेखि सुरु भएको हो । लक्ष्मीपूजाका दिन बन्द भएको ढोका अक्षय तृतीयाका दिन खुल्छ ।
ढोका खुलेपछि पशुपतिनाथको प्रसाद गङ्गोत्रीमा चढाउने गरिएको गङ्गोत्री धामका रावल शिवप्रकाशजी महाराजले बताए ।
काजी अमरसिंहका पालामा सुरु भएको यो परम्परा सुगौली सन्धिको आसपास बन्द भएको थियो । जसलाई १५ वर्षअघि रावल शिवप्रकाशले पुनःस्थापना गर्नुभएको हो ।
यो परम्परालाई दुई देशबीचको पारस्परिक सद्भाव एवं एकताका रूपमा पुनः सुरु गरिएको जनाइएको छ ।
भर्खरै
लोकप्रिय
