काठमाडौँ – नेपालीको दोस्रो ठूला चाड तिहार सकिएसँगै पशुपति क्षेत्रस्थित गुह्येश्वरीमा छठ पर्वको तयारी सुरु भएको छ।
गुह्येश्वरी छठ पूजा समितिले बाँस गाड्ने, घाट सजावटलगायत काम सुरु गरेको हो । शुक्रबारसम्म सबै तयारी पूरा हुने समितिका अध्यक्ष रामबाबु महासेठले जानकारी दिएका छन् ।
गत वर्ष ४५० छठ घाट बनाइएकामा यस वर्ष ६५६ भन्दा बढी बनाउन लागिएको उनले बताए । त्यसमध्ये ३०० भन्दा बढी घाट व्रतालुले लिइसकेका छन् ।
पछिल्लो समय पहाड एवं हिमालवासीले पनि सूर्य आराधनाको पर्व छठ मनाउन थालेका छन् । गुह्येश्वरीमा मात्र वार्षिक लाखौँ व्यक्तिले कार्तिक शुक्ल षष्ठी तिथिमा छठ पर्व मनाउने गरेका छन् ।
तराईमा धुमधामसँग मनाइने सूर्य आराधनाको पर्व छठ एक दशक अघिदेखि काठमाडौँमा पनि भव्यरुपमा मनाउन थालिएको छ । यस वर्ष कात्तिक १६ गते शनिबार छठ पर्व अन्तर्गत अस्ताउँदो सूर्यलाई अर्घ्य दिइन्छ । यस दिन राष्ट्रपति विद्यादेवी भण्डारी गुह्येश्वरी गई अस्ताउँदो सूर्यलाई अर्घ्य दिई पूजा गर्ने जनाइएको छ ।
यही कात्तिक १७ गते आइतबार बिहान उदाउँदो सूर्यलाई अर्घ्य दिएपछि छठ पर्व समापन हुन्छ । छठ पर्व मनाउन सहज होस् भनी शनिबार बिहान गुह्येश्वरी क्षेत्रमा बाग्मती सफाइ महाअभियानले कार्यक्रम राखेको अधिकार सम्पन्न बाग्मती सभ्यता एकीकृत विकास समितिका सञ्चालक सदस्य राम साहले जानकारी दिएका छन् ।
यही कात्तिक १७ गतेपछि पनि गुह्येश्वरी क्षेत्रमा सफाइ गरी पुरानै अवस्थामा फर्काइने जानकारी दिए।
भर्खरै
लोकप्रिय
