दाङ – तारिक अली खानको घर भारत नयाँ दिल्लीमा हो । उनी परिवारका सदस्यलाई लिएर भ्रमणका लागि कोइलाबास आए । ‘पछपेडुवामा विवाह थियो । समय बचेपछि कोइलाबास घुम्न आएका हौँ ।’ खानले भने, ‘यहाँको हरियाली, पहाड, खोलाले तान्यो ।’
गढवा गाउँपालिका वडा नम्बर ८ कोइलाबास खण्डहर छ । तर, बिस्तारै यहाँ भारतीय पर्यटकको भ्रमणको गन्तव्य बन्न पुगेको छ । हरेक दिन २०० भन्दा बढी भारतीय पर्यटक कोइलाबास आउने गरेको वडा अध्यक्ष सद्दाम सिद्दिकीले जानकारी दिए ।
‘दिल्ली, लखनउ, कानपुरबाट पर्यटकहरु यहाँ आउने गर्नुहुन्छ । हामीले पर्यटकीय गन्तव्य बनाउन थप झोलुङ्गे पुल बनाउदै छौँ ।’ उनले भने ।
कुनै समय व्यापारीक गन्तव्य बनेको कोइलाबासमा आन्तरिक भन्दा बाहृय पर्यटकको भ्रमण गन्तव्य बनेको हो । लमहीबाट कोइलाबास पुग्न ३३ किलोमिटरको पक्की बाटो बन्दै छ । भारतबाट कोइलाबास सडक सञ्जालले जोडिएको छ ।
‘भारतबाट सीमासम्म पक्की सडक आएको छ । त्यहीँ भएर भारतीय पर्यटक आउनुहुन्छ ।’ सिद्दिकीले भने, ‘लमहीबाट कोइलाबाससम्म सडक बनिसकेर नियमित बस चल्न थाल्यो भने यहाँ पर्यटकको संख्या बढ्ने छ ।’
वडा कार्यालयले कोइलाबासमा पर्यटकलाई लक्षित गरेर भ्यू टावर, चिल्ड्रेन पार्क, झोलुङ्गे पुल, कोइलाबास खोलामा ड्याम बनाउने योजना बनाएको वडा अध्यक्ष सिद्दिकीले बताए ।
अहिले पर्यटकहरु यहाँ पहाड र खोला हेर्न आउने गर्छन् । तर, कोइलाबासमा पर्यटन गन्तव्य बन्न थाले पनि पर्यटकहरुको लागि पूर्वाधार तथा आधारभूत सुविधा छैन ।
खानेपानीको चरम समस्या रहेको कोइलाबासमा पानीको समस्या समाधान गर्नु मुख्य कार्यक्रम बनाउन आवश्यक छ । लमही जेसिजले पर्यटन वर्ष २०२० लाई प्रवर्द्धन गर्न नेपाल–भारतको सीमा कोइलाबासमा स्वागत बोर्ड स्थापना गरेको छ ।
भर्खरै
लोकप्रिय
