काठमाडौँ – नेपाल भ्रमण वर्ष २०२० अभियानको प्रभावकारी प्रवर्द्धनका लागि अन्तर्राष्ट्रिय सञ्जाल भएको प्यासिफिक एसिया ट्राभल एशोसिएसन (पाटा) नेपाल च्याप्टरले सहकार्य गर्ने भएको छ ।
उक्त प्रयोजनका निम्ति पाटा नेपालका पदाधिकारीले शुक्रबार संस्कृति, पर्यटन तथा नागरिक उड्डयनमन्त्री योगेशकुमार भट्टराईसँग छलफल गरी भ्रमण वर्षका आगामी कार्यक्रमलाई समन्वय र सहकार्यका साथ सफल बनाउन पहल थालेको हो ।
पाटाका अध्यक्ष सुनील शाक्य नेतृत्वको टोलीले शुक्रबार पर्यटनमन्त्री भट्टराईसँग भेट गरी भ्रमण वर्षका कार्यक्रमलाई आगामी दिनमा कसरी प्रभावकारी र फलदायी बनाउने भन्ने विषयमा छलफल भएको पाटा नेपालका प्रमुख कार्यकारी अधिकृत सुरेशसिंह बुडालले जानकारी दिए ।
पाटाले भ्रमण वर्षका अवसरमा नेपाल–भारत र चीनबिच सामूहिक पर्यटन प्रवर्द्धनका कार्यक्रमबारे पर्यटनमन्त्रीलाई अवगत गराएको थियो ।
सो अवसरमा पर्यटनमन्त्री भट्टराईले भ्रमण वर्षमा छिमेकी मुलुक भारत र चीनबाट बढी भन्दा बढी पर्यटक आकर्षण गर्नका लागि मन्त्रालय तथा सरोकार भएका निकायसँग साझेदारी गरी प्रभावकारी प्रवर्द्धनात्मक गतिविधि अगाडि बढाउने बताए ।
उनले भारत र चीन लक्षित प्रवर्द्धनात्मक गतिविधिले भ्रमण वर्षलाई सफल पार्न सहयोग पुग्ने पाटा नेपालले गर्ने पर्यटन प्रवर्द्धनका कामलाई मन्त्रालयले सक्दो सहयोग गर्ने धारणा राख्नुभएको बुडालले बताए । पाटाले नेपालमा हिमालय ट्राभल मार्टलगायत महत्वपूर्ण पर्यटकीय इभेन्ट आयोजना गर्दै आएको छ ।
भर्खरै
लोकप्रिय
