झापा – चीनको वुहानबाट ल्याइएका एक सय ७५ जनाको आइतबार ‘थ्रोट स्वाब’ परीक्षण गरिने भएको छ। चीनबाट नेपाल आएका नेपाली चिकित्सक डा. माधव गौतमका अनुसार उनीहरुको घाँटीबाट स्वाब निकालेर परीक्षण गर्न लागिएको हो।
उनले फोन सम्पर्कमा भने, ‘थ्रोट स्वाबको नमूना संकलन गरेपछि हामी खाना खान्छौं।’ अहिले चीनबाट आएका कसैमा पनि स्वास्थ्य समस्या नदेखिएको डा. गौतमले बताए। उनले भने, ‘हामीलाई केही पनि भएको छैन।’
आइतबार बिहान करिब ३.२० बजे त्रिभुवन अन्तर्राष्ट्रिय विमानस्थलमा अवतरण गरेपछि उनीहरुको स्वास्थ्य ‘स्क्रिनिङ’ गरिएको डा. गौतमले बताए।
सञ्चार साधनको अभाव
उनले चीनमा लामो समय बसेर आएका धेरै जनाको नेपालको सिमकार्ड नभएकाले परिवारसँग सम्पर्कका लागि गाह्रो भएको बताए।
उनीहरुलाई राखिएको स्थानमा इन्टरनेटको सुविधा अत्यन्तै कमजोर भएका कारण सञ्चार सम्पर्क धेरै गाह्रो भएको उनले बताए।
डा. गौतमले भने, ‘हाम्रा परिवारका सदस्यले लिएर आएको सिमकार्ड हामीले पाउने व्यवस्था भइदिए राम्रो हुने थियो।’
उनले चाँडो सञ्चार सम्पर्कको व्यवस्थामा सहयोग गरिदिन सरकारसंग आग्रह गरेका छन्।
भर्खरै
लोकप्रिय
