सहसचिव र उपसचिवको दरखास्त स्थगित

काठमाडौँ – लोकसेवा आयोगले विभिन्न सेवाका सहसचिव, उपसचिव, स्वास्थ्यतर्फको ११औँ र ९औँ तहको बढुवाका आन्तरिक तथा खुलातिरका सबै विज्ञापन दरखास्त स्थगित गरेको छ।

आयोगले मंगलबार सर्वोच्च अदालतबाट जारी भएका तीनवटा अन्तरकालिन अन्तरिम आदेशको पालना स्वरुप दरखास्त स्थगित गरिएको जनाएको छ।

आयोगका सूचना अधिकारी देवीप्रसाद सुवेदीद्वारा जारी सूचनामा अर्को सूचना जारी नभएसम्म सबै पदमा दरखास्त रोकिएको जनाइएको छ।

सामान्य प्रशासन मन्त्रालयले पद लुकाएर माग पठाएको भन्दै वरिष्ठ उपसचिव र अधिकृतहरुले छुट्टा छुट्टै सर्वोच्च अदालतमा मुद्दा दायर गरेका थिए।