प्रहरी हिरासतको शौचालयमा थुनुवा झुण्डिए

नेपालगञ्ज – जिल्ला प्रहरी कार्यालय, बाँकेको हिरासतमा एकजना थुनुवाले आत्महत्या गरेका छन् ।

प्रहरी स्रोतका अनुसार, बाँके वनकट्टीका बाबुलाल रैदासले शुक्रबार बिहान आत्महत्या गरेका हुन् ।

रैदास अभद्र व्यवहारमा हिरासतमा रहेका थिए । प्रहरीले उनलाई ज्यान मुद्दामा पनि अनुसन्धान गरिरहेको थियो ।

प्रमाण फेला परिनसकेकाले अभद्र व्यवहारमा हिरासतमा राखिएको थियो । वनकट्टीमा केही दिन अघि भएको बालक हत्या घटनामा रैदासलाई नियन्त्रणमा लिइएको थियो ।

शुक्रबार बिहान साढे पाँच बजे रैदासले हिरासतको शौचालयमा झुण्डिएर आत्महत्या गरेका छन् ।

रैदासले जाडो भन्दै टाउकोमा कपडा बाँधिरहन्थे । त्यही कपडाले पासो लगाएर बिहान शौचालयमा आत्महत्या गरेको प्रहरीले बताएको छ ।