काठमाडौँ– निवर्तमान संस्कृति, पर्यटन तथा नागरिक उड्डयनमन्त्री योगेश भट्टराईले विघटन भएको संसद अदालतबाट पुनर्स्थापना हुने विश्वास व्यक्त गरेका छन्।
मन्त्रालयमा आयोजित औपचारिक बिदाइ कार्यक्रममा बोल्दै भट्टराईले संवैधानिक अंगहरु स्वतन्त्र रहेको अवस्थामा संसद पुनर्स्थापना हुने विश्वास व्यक्त गरेका हुन्।
लोकतान्त्रिक प्रक्रियामा आघात पुगेका कारण आफूसहितका मन्त्रीहरुले सामूहिक राजीनामा दिएको उल्लेख गर्दै उनले भने, ‘यसलाई ट्रयाकमा ल्याउने मलाई विश्वास छ। यदि यो देशका संवैधानिक अंगहरु स्वतन्त्र छन् विवेक पुर्याउँछन्, त्यहाँका मान्छेहरु ठिक छन् भने शत प्रतिशतभन्दा पनि बढी विश्वासका साथ भन्छु- संसद पुर्नस्थापना हुन्छ। मुलुकप्रति संविधानप्रति जवाफदेही छन् भने शतप्रतिशत संसद पुर्नस्थापना हुन्छ। हुनुपर्छ। त्यो नै हाम्रो लोकतन्त्रको विजय हुन्छ। संविधानको रक्षा हुन्छ।’
भट्टराईले प्रधानमन्त्री केपी शर्मा ओलीले संसद विघटनको प्रस्ताव गर्दा आफूहरुले रोक्ने धेरै प्रयास गरेपनि सम्भव नभएको उनले बताए।
प्रधानमन्त्री ओलीको कदम गैरसंवैधानिक रहेको उल्लेख गर्दै उनले भने, ‘संविधान पल्टाएर हेर्दा संवैधानिक नै छैन। कानून र संविधानको हिसाबले मेल खाँदैन। राजनीतिक हिसाबले राजनीतकि मूल्यलाई बोकेको छैन। जुनसुकै कारणले भएपनि यो अलोकतान्त्रिक नै हो। अन्य बाटोहरु पनि थिए। असंवैधानिक काम गर्न नपर्ने थियो, गर्नु भयो। दुःखी छौँ।’
भट्टराईको विदाईमा मन्त्रालयका सचिव यादव कोइरालाले नेपाली ढाका टोपीका साथै फुलगुच्छा र मायाको चिनो दिएका छन्। मन्त्रालयका अन्य कर्मचारी, युनियन कर्मचारी संघठनका पदाधिकारी लगायतका व्यक्तित्वहरुले समेत मन्त्री भट्टराईलाई स–सम्मान विदाइ गरेका छन्।
भर्खरै
लोकप्रिय
