लगन जुर्‍यो कात्तिकमा

पुत्ला बोक्ने राँके भूतको टोली उता तरफ
कोरोना भनि निषेधको गोली उता तरफ।।

अड्डामा खेले देउसी खान्की मागी मागी
भट्याउँदै गाउँदै थापे झोली उता तरफ।।

भाले जुधाइ फेरि पनि बाजी मार्ने कस्ले
जित्ने चाहिँ खेल्न तयार होली उता तरफ।।

सल्लाह साउती चलेन आफ्नै घरमा पनि
ओठ चल्छ यता तिर बोली उता तरफ।।

ब्याइते घर निकाला ल्याइते चाहिँ हावी
आफू त एकल भइयो जोली उता तरफ।।

जता जता काफल पाक्यो उतै चरी नाच्यो
आज हाजिर यता भए भोलि उता तरफ।।

घरको न घाटको हुँदा भोकै बसुन् कति
दाना पानी मागी थापे सोली उता तरफ।।

दान पाएको चिथ्रो टाल टुल पारौँ भन्दा
सिउँदै जाँदा च्यातियो चोली उता तरफ।।

खुइलिएको पात्रो हेरे पाना पल्टाइ पल्टाइ
लगन जुर्‍यो कात्तिकमा डोली उता तरफ।।