दाङमा मूल्यवृद्धिको विरोधमा अनशनबसे स्वतन्त्र युवा

दाङ–लमही बसपार्क नजिक, मुल सडक छेउमा एउटा टेन्ट टाँगिएको छ । त्यो टेन्टमुनी दुई जना युवा अनशनमा बसेका छन । खालि सिलिन्डरको आडैमा बसेका युवाको छातिमा मुल्य वृद्धि फिर्ता गर्नबारे माग राखिएको प्ले कार्ड टाँसिएको छ ।

सरकारले पेट्रोलियम पदार्थ र खाना पकाउने ग्यासमा गरेको मूल्य वृद्धीको विरोधमा स्वतन्त्र युवाहरुले विरोध स्वरुप अनशन बसेका छन । लमही नगरपालिका–५ निवासी डिल्लीराज खनाल र लमही नगरपालिका–४ निवासी बाबु रोका मगर दुई जना मुल्य वृद्धीको विरोधमा अनशन बसेका हुन् ।

‘न हामीले सडक चक्काजाम गर्छौं । न टायर बाल्छौं । सरकारले गरेको नराम्रो कामको विरोध आवाजबाट र अनशनबाट गर्न थालेका हौं’ अनशनरत युवा डिल्लीराज खनालले भने– ‘यो अनशन कहिले टुंगोमा पुग्छ थाहा छैन । सरकारले जहिले मूल्य वृद्धी फिर्ता गर्छ । त्यतिबेला सम्म हाम्रो आन्दोलन चलिरहन्छ ।’

सरकारको बिरोध गर्न सार्वजनिक सम्पत्तिको क्षति गर्ने, नारा जुलुस लगाउने, सडक चक्काजाम गर्ने, डायर बाल्ने जस्ता कार्य गर्ने परिपाटी बसेको छ । तर, लमहीका दुई युवाले सरकारको ध्यानाकर्षणको लागि सडकमा अनशन बसेर शान्तिपूर्ण आन्दोलन गरिरहेका हुन् ।

‘अनशन बस्नु हाम्रो रहर होइन । हाम्रो बाध्यता हो । उपभोक्ताको ढाड सेक्नेगरी सरकारले मूल्य बृद्धी गरेको छ । यसको बिरुद्ध हाम्रो अनशन हो’बावु रोकाले भने–‘पेट्रोलियम पदार्थमा भएको मूल्य बृद्धीले हाम्रो भान्सा, हाम्रो सार्वजनिक यातायात सबै क्षेत्र महंगो हुन पुग्यो ।’

नारायणी पौडेल खाना पकाउने ग्यास सकिएपछि किन्न पुगिन । जहाँ उनले सधैं एक हजार ६ सय मुल्य तिरेर किन्ने ग्यास दुई सय रुपैयाँ बढी थपेर एक हजार ८ सयमा किन्नुपर्यो । सरकारले खाना पकाउने ग्यासको मुल्य बढाएपछी पौडेल जस्ता गृहणीको भान्सा महंगो भएको छ ।

‘खाना पकाउने ग्यासको मूल्य एक्कासि बढ्यो । आम्दानी बढ्ने कुरै भएन । खर्च मात्रै बढ्दा ऋणमा घर व्यहार चलाउनुपर्ने स्थिति आयो’ उनले भनिन्– ‘मुल्य वृद्धी फिर्ता गरेर सरकारले सहुलियत दिनुपर्छ ।’

पेट्रोलियम पदार्थको मूल्य यो अवधिमा लगातार दुई पटक बढ्यो । जसको असर चौतर्फि परेको छ । सार्वजनिक यातायातको भाडामा वृद्धि भएको छ । जसले गर्दा दैनिक उपभोग्य बस्तुको मुल्य पनि बढेको छ । उपभोक्ता हित संरक्षणको क्षेत्रमा काम गर्ने अभियन्ताहरुले तुरुन्त मूल्य वृद्धि फिर्ता गरेर उपभोक्तालाई राहत दिनुपर्ने बताएका छन ।

‘सरकारको असफलता हो । बजारमा दैनिक उपभोग्य बस्तुको मुल्य बढेर जनताको ढाड सेकिएको छ’उपभोक्ता हित संरक्षण मञ्चका केन्द्रीय उपाध्यक्ष केशवकुमार शर्माले भने– सरकारले उपभोक्ताको हितमा काम गर्नुपर्छ ।’