विश्वको अग्रणी माइक्रोब्लगिङ एप ट्विटर अब विश्वकै धनी एलोन मस्ककाे बनेकाे छ। मस्कले सिइओ पराग अग्रवाललगायत धेरै उच्च अधिकारीहरूलाई बर्खास्त गरिसकेका छन्।
टेस्लाका सिइओ एलोन मस्क शुक्रबार ट्विटर अधिग्रहणको अन्तिम मिति अघि नै यसको नयाँ मालिक बने।
समाचार रिपोर्टका अनुसार ट्विटरका सिइओ अग्रवाल र मुख्य वित्तीय अधिकारी (सिएफओ) नेड सेगललाई मस्क मालिक बनेपछि बर्खास्त गरिएको थियो।
मस्कले यसै वर्ष अप्रिल १३ मा ट्विटरको अधिग्रहणको घोषणा गरेका थिए। उनले प्रति सेयर ५४.२ डलरमा ४४ अर्ब डलरको सम्झौता प्रस्ताव गरेका थिए। तर, ट्विटरको फेक अकाउन्टका कारण ट्विटर र उनीबीच विवाद भयो र उनीहरूले ९ जुलाईमा सम्झौताबाट पछि हट्ने निर्णय गरे।
यसपछि ट्विटरले अमेरिकी अदालतमा मस्कविरुद्ध मुद्दा दायर गरेको थियो। यसमा डेलावेयरको अदालतले अक्टोबर २८ सम्ममा ट्विटरको सम्झौता पूरा गर्न आदेश दिएको छ।
बुधवार सिङ्क लिएर ट्विटरको अफिस पुगेका मस्कले सबैलाई चकित पारेका थिए।
भर्खरै
लोकप्रिय
