वीरगञ्ज – पर्साको वीरगञ्ज महानगरपालिका र पटेर्वा सुगौली गाउँपालिकाले पालिकामा कार्यरत कर्मचारी हटाएका छन्। दुवै पालिकाले सूचना जारी गर्दै कर्मचारी हटाएको जानकारी गराएका छन्।
वीरगञ्ज महानगरपालिकाले दैनिक ज्यालादारीमा कार्यरत चार सयभन्दा बढी कर्मचारी पुस १ गतेबाट लागू हुने गरी हटाएको छ। महानगरका वडा कार्यालय, स्वास्थ्य चौकी, कम्प्युटर अपरेटरलगायतमा दैनिक ज्यालादारीमा कार्यरत कर्मचारीहरुलाई हटाइएका सूचनामा उल्लेख छ।
नगर प्रहरी र बारुणयन्त्रमा कार्यरत कर्मचारीहरुलाई भने हटाइएको छैन। वीरगञ्ज महानगरले दैनिक ज्यालादारीमा पछिल्लो समय चार सयभन्दा बढी कर्मचारी नियुक्त गरेको थियो।
यसैगरि, पर्साको पटेर्वा सुगौली गाउँपालिकाले सामुदायिक विद्यालयमा निजी स्रोतबाट कार्यरत २९ जना कर्मचारी हटाएको छ। गत मंसिर २३ गते बसेको गाउँकार्यपालिकाको बैठकले निजी स्रोतमा कार्यरत सबै २९ जना शिक्षक शिक्षिकालाई आगामी पुष १ गतेदेखि हटाउने निर्णय गरेको थियो।
गत सोमबार सार्वजनिक गरेको सूचनामा गाउँकार्यपालिकाको बैठकले पालिकाबाट प्रदान गर्दै आएको विद्यालय सञ्चालन अनुदान (निजी स्रोत अनुदान) पुष १ गतेबाट रोक्का गर्ने निर्णय भएको गाँउपालिकाका प्रमुख प्रशासकीय अधिकृत सन्देश यादवले जानकारी दिए।
गाउँपालिकाले विद्यालय नपुग शिक्षकको व्यवस्थापन गर्न आवश्यक प्रक्रिया अगाडि बढाउने निर्णय पनि गरेको उनले बताए।
भर्खरै
लोकप्रिय
