बल टेम्परिङ्ग मामिलामा एक वर्षको प्रतिबन्ध खेपेका अस्ट्रेलियन ब्याट्सम्यान तथा बर्खास्तमा परेका उपकप्तान डेविड वार्नरले माफी मागेका छन् ।
वार्नरले अस्ट्रेलियाली क्रिकेटको इज्जत संकटमा पारेकोमा माफी मागेका हुन् । आफूहरुको गतिविधिले अस्ट्रेलिया तथा विश्वभरका फ्यानलाई निराश बनाएकोमा वार्नरले माफी मागेका हुन् ।
वार्नर, कपतान स्टीभन स्मिथ र ब्याट्सम्यान क्यामरन बेनक्राफ्टमाथि क्रिकेट अस्ट्रेलियाले प्रतिबन्ध लगाएको छ । वार्नर र स्मिथमाथि एक वर्ष तथा क्यामरन बेनक्राफ्टमाथि ९ महिनाको प्रतिबन्ध लागेको हो।
वार्नरले माफी माग्दै भनेका छन्, ‘गल्ती भइसक्यो, यसले क्रिकेटको इज्जतमा दाग लगायो । यो हामीले माया गर्ने क्रिकेटमा लागेको धब्बा हो । यसका लागि माफी चाहन्छु ।’
दक्षिण अफ्रिकासँगको तेस्रो टेस्टमा भएको बल टेम्परिङ्गको घटना बाहिर आएपछि यस बारे क्रिकेट अस्ट्रेलियाले अनुसन्धान सुरु गरेको थियो ।
बल टेम्परिङ्गको घटना बाहिर आएपछि अस्ट्रेलियका प्रधानमन्त्रीले समेत दुःख व्यक्त गरेका थिए । अस्ट्रेलियाका प्रधानमन्त्री म्याल्कम टर्नबुलले दक्षिण अफ्रिकाबाट आएको खबरले आफूहरु निराश रहेको बताएका थिए ।
बेनक्राफ्टले दक्षिण अफ्रिकासँगको तेस्रो टेस्टको क्रममा बलमा गडबडीका लागि स्याण्डपेपर प्रयोग गरेको पनि पुष्टि गरेको छ ।
भर्खरै
लोकप्रिय
