टुकुचा किनारका टहरा हटाउन महानगरको ३५ दिने सूचना

काठमाडौँ – काठमाडौँ महानगरपालिकाले टुकुचा खोला किनार क्षेत्रका नक्सा स्वीकृत नभइ बनाइएका घर/टहरा हटाउन सूचना जारी गरेको छ।

काठमाडौँ महानगरपालिका वडा नम्बर १ स्थित सिटी एक्सप्रेस मनी ट्रान्सफर रहेको भवन (काठमाडौँ प्लाजाको उत्तर तर्फ)देखि जय नेपाल हलसम्म टुकुचाखोलाको किनार क्षेत्रको अतिक्रमित संरचना हटाउन महानगरले सूचना जारी गरेको हो।

घरधनीले नहटाएमा महानगरले आफैले ती संरचना हटाउने चेतावनी दिएको छ।

काठमाडौँ महानगरपालिका शहरी व्यवस्थापन विभाग (साविक भवन निर्माण इजाजत विभाग)बाट जारी गरिएको स्वीकृत नक्सा विपरीत, भवन निर्माण मापदण्ड विपरीत र नक्सा नै नलिइ घर/टहरा निर्माण गरेको देखिएको हुँदा त्यस्तो प्रकृतिका भवनहरु यो सूचना जारी भएको ३५ दिनभित्र हटाउन अनुरोध गरिएको छ।