आउँदो प्रतिनिधि र प्रदेशसभा निर्वाचनका लागि मोरङको बाँकी रहेको क्षेत्र र प्रदेशको विषय टुंगो लगाउन शीर्षस्तरीय बैठक काठमाडौंमा जारी रहेको छ।
नेपाली कांग्रेस प्रदेश १ कार्य समितिका एक पदाधिकारीका अनुसार मोरङ क्षेत्र नम्बर ३, ४, ५, ६ को प्रदेश सभाको उम्मेद्वारको विषयमा घनिभूत छलफल चलिरहेको छ।
यसक्रममा मोरङ क्षेत्र नम्बर ३ को ‘ख’ मा सूयर्माराज राई, क्षेत्र नम्बर ४ को ‘क’ मा दिलीप गच्छदार, ‘ख’ मा गुरुराज घिमिरेको सम्भावना बलियो भएको उनको भनाइ छ । त्यसैगरी क्षेत्र नम्बर ५ को ‘क’ मा गयानन्द मण्डल र ‘ख’ मा राजेश गुप्ता र क्षेत्र नम्बर ६ को ‘ख’ मा डा. डिला संग्रौला र केदार कार्कीको नाममा छलफल चलिरहेको उनले जानकारी दिए ।
डा.संग्रौला यसअघि समानुपातिकबाट प्रतिनिधि सभा सदस्यको भूमिकामा रहेकी थिइन् ।
आइतबार असोज २३ गते निर्वाचन आयोगका अनुसार उम्मेदवारी मनोनयन गरिसक्नेपर्ने हुँदा शनिबार अबेरसम्म भएपनि थाती रहेका नाम टुंग्याउन बैठक प्रयासरत रहेको छ ।
क्षेत्र नम्बर ३ मा सूनिल शर्मा प्रतिनिधिसभातर्फबाट उम्मेद्वार चयन भइसके पनि ‘ख’ तर्फ यसअघिका प्रदेश सांसद राईले आफ्नो अडान कायम राखेका छन् । यसक्रममा विराटनगर महानगरपालिकाका पूर्व मेयर भीम पराजुली पनि प्रदेशको टिकट आफूले पाउनुपर्ने दाबीसहित लबिङमा रहेका छन् ।
प्रदेश पदाधिकारीका अनुसार छलफल भइरहँदा नाम प्रस्ट भएका लागि केन्द्रले टिकट उपलब्ध गराउने र छलफल टुंगिने अवस्था नभए आइतबार भोलि केन्द्रले नै निर्वाचन आयोगलाई वा सम्बन्धित क्षेत्रलाई पत्र पठाउने तयारी भइरहेको छ ।
मोरङको क्षेत्र नम्बर ६ को ‘क’ मा भने नेकपा माओवादीतर्फको उम्मेदवारका लागि गठबन्धनबीच पनि छलफल भइरहेको छ। अघिल्लोपटक नेपाली कांग्रेसका चुमनारायण तबदारले जित हासिल गरेको क्षेत्रमा माओवादी अध्यक्ष पुष्पकमल दाहालका पारिवारिक सदस्य जीवन आचार्यको दाबी रहेको छ ।
२०७४ को प्रदेश सभा निर्वाचनमा आचार्य तबदारसँग २ हजार ४३ मतान्तरले पराजित भएका थिए ।
हालसम्म मोरङमा प्रतिनिधि सभातर्फ क्षेत्र नम्बर १ मा मोरङ जिल्ला सभापति डिगबहादुर लिम्बू, क्षेत्र नम्बर ३ मा सूनिल शर्मा, क्षेत्र नम्बर ६ मा डा. शेखर कोइरालाको नाम चयन भइसकेको छ ।
क्षेत्र नम्बर २ मा डा. मीनेन्द्र रिजाल र सुजाता कोइरालाको नाममा छलफल भइरहेको छ ।
२०७४ सालको प्रतिनिधि सभा निर्वाचनमा डा. रिजाल मोरङमा कांग्रेसतर्फका एकमात्र विजयी उम्मेदवार हुन् ।
यसपटक भने सो क्षेत्रमा कोइरालाले पनि इच्छा देखाएपछि नाम निर्क्यौल गर्न शीर्षतहमा सकस भइरहेको बताइएको छ ।
भर्खरै
लोकप्रिय
