जनकपुरधाम – धनुषाको विभिन्न निर्वाचन क्षेत्रमा आधा दर्जनभन्दा बढी पूर्वमन्त्रीहरूले प्रतिनिधिसभाको निर्वाचनका लागि उम्मेदवारी दर्ता गराउन लागेका छन् ।
चार वटा निर्वाचन क्षेत्र रहेको धनुषाको सबै निर्वाचन क्षेत्रबाट पूर्वमन्त्रिहरूले विभिन्न पार्टीबाट आज उम्मेदवारी दर्ता गराउन लागेका हुन् ।
धनुषा निर्वाचन क्षेत्र नं. १ मा सत्ता गठबन्धनकोतर्फबाट माओवादी केन्द्रका नेता एवम् पूर्वमन्त्री मातृकाप्रसाद यादवले उम्मेदवारी दर्ता गराउन लागेका छन् ।
उनको विपक्षमा एमाले-जसपा गठबन्धनबाट जसपाका दिपक कार्कीले टिकट पाएका छन् । गत निर्वाचनमा यहाँ माओवादी केन्द्रबाट मातृका यादव निर्वाचित भएका थिए ।
यस्तै, धनुषा निर्वाचन क्षेत्र नं. २ बाट सत्तारुढ दलको गठबन्धनबाट नेपाली कांग्रेसका नेता एवम् पूर्वमन्त्री रामकृष्ण यादव उम्मेदवारी दिन लागेका हुन् भने उनको विपक्षमा पूर्वमन्त्री हालै एमाले प्रवेश गरेका उमाशंकर अरगरिया उम्मेदवारी दिन लागेका हुन् ।
यस्तै, जसपाबाट गंगाराम यादवले टिकट पाएका छन् । धनुषा २ मा एमाले र जसपा मित्रवद्ध प्रतिस्पर्धा गरिरहेको छ । धनुषा २ मा तत्कालिन राजपा नेपालबाट अरगरीया निर्वाचित भएका थिए ।
यसैगरी, धनुषा क्षेत्र नं. ३ मा सत्तागठबन्धनको तर्फबाट पूर्वमन्त्री एवम् लोसपाका नेता अनिलकुमार झा उम्मेदवारी दिन लागेका हुन् ।
उनको विपक्षमा एमाले जसपाका गठबन्धनको तर्फबाट एमाले नेतृ एवम् पूर्वमन्त्री जुलीकुमारी महासेठले टिकट पाएकी छिन् ।
यहाँ गत निर्वाचनमा तत्कालीन राजपाबाट राजेन्द्र महतो निर्वाचित भएका थिए तर हाल उनी यो निर्वाचन क्षेत्र छाडेर सर्लाहीबाट उम्मेदवारी दिन लागेका हुन् ।
धनुषा क्षेत्र नं. ४ मा नेकपा एमालेका सचिव एवम् पूर्वमन्त्री रघुवीर महासेठ र नेपाली कांग्रेसको तर्फबाट पूर्वमन्त्री महेन्द्र यादवले उम्मेदवारी दिन लागेका हुन् ।
यहाँबाट गत निर्वाचनमा एमालेबाट महासेठ निर्वाचित भएका थिए ।
भर्खरै
लोकप्रिय
