काठमाडौँ – सत्तारुढ गठबन्धनले सर्लाही २ मा नेपाल समाजवादी पार्टीका महिन्द्र राय यादव आधिकारिक उम्मेदवार भएको जनाएको छ।
चार दलीय गठबन्धनले विज्ञप्ति जारी गर्दै लोसपाका राजेन्द्र महतोलाई पन्छाउँदै यादवलाई सर्लाही २ मा आधिकारिक उम्मेदवार मान्ने निर्णय गरेको हो। यसअघि कांग्रेस र लोसपाबीच सर्लाही महतोका लागि छाड्ने र मित्रवत प्रतिस्पर्धा गर्ने निर्णय भएको थियो।
तर चार दलीय गठबन्धनले मित्रवत प्रतिस्पर्धा गर्ने कांग्रेस लोसपाको निर्णयलाई अस्वीकार गर्दै यादवलाई आधिकारिक उम्मेदवार घोषणा गरेको हो।
चारदलीय गठबन्धन र लोसपाबीच मधेस प्रदेशका सात निर्वाचन क्षेत्रमा तालमेल भएको छ । सत्तारुढ गठबन्धनको यो निर्णयसँगै महतो संकटमा परेका छन्।
यस्तै, सर्लाही २ (क) मा सुनिल साह र (ख) मा कौशलकिशोर यादव आधिकारिक उम्मेदवार रहेको शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधवकुमार नेपाल र राष्ट्रिय जनमोर्चाकी उपाध्यक्ष दुर्गा पौडेलले जारी गरेको विज्ञप्तिमा उल्लेख छ।
गठबन्धनले आगामी निर्वाचनमा दलहरूबीचको सहमतिअनुरुप सम्बन्धित पार्टीको निर्देशन मानेर बागी उम्मेदवार फिर्ता लिएकोमा सबैलाई धन्यवाद दिएको छ।
भर्खरै
लोकप्रिय
