काठमाडौँ– निर्वाचन आयोगले नेपाल धितोपत्र बोर्ड र बीमा समितिसँग स्पष्टीकरण माग गरेको छ।
निर्वाचन आचारसंहिता लागु भइरहेको अवस्थामा सरकारले नेपाल धितोपत्र बोर्ड र बीमा समितिमार्फत लाइसेन्स वितरण गर्न खोजेको भन्ने विवरण सार्वजनिक भएकाले आयोगले स्पष्ट पार्न भनेको हो।
आयोगले आचारसंहिता विपरीत दीर्घकालीन असर पार्ने क्रियाकलाप र योजना अघि नबढाउन भनेको छ। यस्तो अवस्थामा धितोपत्र बोर्ड र बीमा समितिले लाइसेन्स वितरण गरे आयोगले रद्द गरिदिन सक्छ।
आयोगले शनिबार सूचना जारी गर्दै स्पष्टीकरण माग गरेको हो। तीन दिनभित्र जवाफ पेश गर्न आयोगको निर्देशन छ।
‘निर्वाचन आचारसंहिता लागू भैसकेको अवस्थामा त्यहाँबाट लाइसेन्स वितरण गर्ने सम्बन्धमा कुनै प्रक्रिया अगाडि बढाइएको छ छैन? लाइसेन्स वितरण गर्ने सम्बन्धमा कुनै प्रक्रिया अघि बढाइएको भए निर्वाचन आचारसंहिता विपरितको उक्त कार्य किन रोक्नु नपर्ने हो? यो पत्र प्राप्त भएको मितिले तीन दिनभित्र निर्वाचन आयोगमा जवाफ पठाउन आग्रह छ,’ आयोगले भनेको छ।
भर्खरै
लोकप्रिय
