काठमाडौँ – नेकपा माओवादी केन्द्र काठमाडौँमा थप कमजोर बनेको छ । २०७० को चुनावदेखि नै कमजार देखिएको माओवादी मंसिर ४ गते भएको प्रदेश तथा प्रतिनिधिसभाको चुनावमा काठमाडौँमा उम्मेदवारी दिएका सबै क्षेत्रमा पराजित भएको छ ।
काठमाडौँमा प्रतिनिधिसभाका १० मध्ये पाँच र प्रदेशसभाका २० मध्ये ६ क्षेत्रमा उम्मेदवारी दिएको माओवादीका उम्मेदवार सबै ठाउँमा पराजित भएका छन् ।
माओवादीको नेतृत्व लिन सक्नेमध्ये एक महिला नेतृ ठानिएकी पूर्वसभामुखसमेत रहेकी ओनसरी घर्ती मगर काठमाडौँ २ बाट गठबन्धनको उम्मेदवार बनेकी थिइन् । उनी चार हजार ९४९ मत ल्याएर पराजित भइन् । सो क्षेत्रमा राष्ट्रिय स्वतन्त्र पार्टीकी सोबिता गौतम विजयी भइन् ।
यस्तै, काठमाडौँ क्षेत्र नम्बर ३ मा पनि माओवादी उम्मेदवार पराजित भए ।
सत्ता गठबन्धनको सहमति विपरित उम्मेदवारी बद्रिप्रसाद बजगाईँ ५१८ तम ल्याएर पराजित भए । बजगाईँले अन्तिम समयमा उम्मेदवारी निष्क्रिय गराएको बताएका थिए । काठमाडौँमा ३ मा कांग्रेसका सन्तोष चालिसे विजयी भएका छन् ।
पूर्वप्रधानमन्त्री डा. बाबुराम भट्टराई पुत्री मानुषी यमी भट्टराई (अस्मिता सिंह) सत्ता गठबन्धनको तर्फबाट माओवादीको उम्मेदवार बनेकी थिइन् । उनी ६ हजार ६३ मत ल्याएर तेस्रो भइन् । यो क्षेत्रमा राष्ट्रिय स्वतन्त्र पार्टीका गणेश पराजुली विजयी भए ।
यस्तै, काठमाडौँ ९ गठबन्धनको उम्मेदवारका रुपमा प्रस्तुत भएकी माओवादीकी कल्पना धमला पराजित भइन् । उनले ६४ सय ४ मत पाइन् । यो क्षेत्रमा एमालेका कृष्णगोपाल श्रेष्ठ विजयीका छन् ।
यस्तै काठमाडौँ क्षेत्र नम्बर १० मा पनि माओवादी उम्मेदवार अञ्जना विसंखे पराजित भइन् । गठबन्धनको साझा उम्मेदवार नरहेकी उनले ५ हजार २६५ मत पाइन् । गठबन्धनका उम्मेदवार कांग्रेसका राजन केसी यो क्षेत्रबाट विजयी भएका छन् ।
प्रदेशसभामा पनि माओवादीको विजोग
काठमाडौँका ६ प्रदेशसभा क्षेत्रमा उम्मेदवारी दिएका माओवादी उम्मेदवार पराजित भए।
प्रदेशसभामा काठमाडौँमा ३ (क) मा कपिल उप्रेती, काठमाडौँ ३ (ख) मा महेश्वर फुयाल पारजित भए । यस्तै काठमाडौँ ६ (क) मा रवीन्द्र प्रसाद श्रेष्ठ तथा ६ (ख) मा प्रकाश फुयाल, काठमाडौँ १० (क) मा दीलिप महर्जन तथा १० (ख) मा गणेश कुँवर पराजित भएका छन् ।
गत वैशाखामा भएको स्थानीय तहको चुनावमा माओवादीले काठमाडौँका १३८ वडामा ७२ मा उम्मेदवार उठाएको थियो, उनीहरूले १६ हजार मत मात्रै पाएका थिए ।
भर्खरै
लोकप्रिय
