विराटनगर – आउँदो मंसिर ४ मा हुने चुनावका लागि आइतबार उम्मेदवारी दर्ता हुँदैछ । मोरङका ६ निर्वाचन क्षेत्रमा सात लाख ३५ हजार ५२५ मतदाताबाट चुनिनका लागि विभिन्न दलका उम्मेदवारहरु प्रतिस्पर्धामा छन् ।
प्रदेश निर्वाचन कार्यालय प्रदेश १ विराटनगरका प्रमुख लेवन कश्यप अधिकारीका अनुसार मोरङको क्षेत्र नम्बर ३ मा सर्वाधिक मतदाता रहेका छन् । ५५ वटा मतदानस्थल र १ सय ६७ वटा मतदानकेन्द्र रहेको क्षेत्रमा कुल मतदाता संख्या १ लाख ४९ हजार ८ सय ३३ रहेको प्रदेश निर्वाचन कार्यालयका प्रमुख अधिकारीले जानकारी दिए ।
सो क्षेत्रमा नेपाली कांग्रेसबाट सुनिल शर्मा, एमालेबाट भानुभक्त ढकाल, राप्रपाबाट रेखा थापाको उम्मेदवारी रहेको छ । यस क्षेत्रमा कानेपोखरी गाँउपालिका, पथरीशनिश्चरे नगरपालिका, बेलबारी नगरपालिका, सुन्दरहरैँचा नगरपालिकाका वडाहरु पर्छन् ।
मतदाता संख्याका आधारमा मोरङको दोस्रो ठूलो क्षेत्र रहेको क्षेत्र नम्बर ६ मा कुल १ लाख २६ हजार ७ सय ६१ मतदाता रहेका छन् । ३९ वटा मतदानस्थल र १ सय ४१ वटा मतदान केन्द्र रहेको यस क्षेत्रको प्रदेश १ तर्फ ७८ हजार ९ सय ६४ र प्रदेश २ तर्फ ४७ हजार ७ सय ९७ मतदाता रहेका छन् ।
प्रतिनीधिसभातर्फ कांग्रेसका नेता डा. शेखर कोइराला र एमाले नेता लालबाबु पण्डितबीच मोरङको क्षेत्र नम्बर ६ मा पुनःप्रतिस्पर्धा हुनेछ । त्यसैगरी, दलीय गठबन्धनसँगै ६ मा कांग्रेसतर्फ प्रदेशका मन्त्री केदार कार्की र माओवादीका युवा नेता जीवन आचार्य रहने छन् । यस क्षेत्रमा एमालेबाट रीता न्यौपाने र जसपाले राजेन्द्र गुप्तालाई टिकट दिएको छ । यस क्षेत्रमा बुढीगंगा गाँउपालिका, विराटनगर महानगरपालिका, सुन्दरहरैँचा नगरपालिकाका विभिन्न वडा पर्दछ ।
त्यसैगरी, क्षेत्र नम्बर २ को प्रदेश १ तर्फ ६१ हजार ५८ र प्रदेश २ तर्फ ६३ हजार ६ सय ७१ मतसहित कुल १ लाख २४ हजार ७ सय २९ मतदाता रहेका छन् । २०७४ सालको निर्वाचनमा कांग्रेसका डा। मीनेन्द्र रिजालले जित हातपारेको क्षेत्रमा यसपटक कांग्रेसबाट सुजाता कोइराला, एमालेबाट ऋषिकेश पोखरेलबीच प्रतिस्पर्धा हुनेछ । क्षेत्र नम्बर २ मा ६८ वटा मतदानस्थल र १ सय ५१ वटा मतदान केन्द्र रहेको छ । यस क्षेत्रमा रतुवामाई नगरपालिका, सुनवर्षी नगरपालिका, कानेपोखरी गाँउपालिका, पथरीशनिश्चरे नगरपालिका, रंगेली नगरपालिकाका वडा कार्यालय पर्दछन् ।
मोरङको उत्तरीपूर्व भेगमा पर्ने क्षेत्र नम्बर १ कुल १ लाख २३ हजार ६ सय १५ मतदाता रहेका छन् । यसको प्रदेश १ तर्फ ६४ हजार ४ सय ८२ र प्रदेश २ तर्फ ५९ हजार १ सय ३३ मतदाता रहेको प्रदेश निर्वाचन कार्यालयले जनाएको छ । यस क्षेत्रमा ६० वटा मतदानस्थल र १ सय ४३ वटा मतदान केन्द्र रहेको छ ।
सो क्षेत्रमा कांग्रेसका मोरङ जिल्ला सभापति डिगबहादुर लिम्बु, एमालेबाट घनश्याम खतिवडाबीच स्पर्धा हुनेछ । यस क्षेत्रमा उर्लाबारी नगरपालिका, मिक्लाजुंग गाँउपालिका, केरावारी गाँउपालिका, र लेटांग नगरपालिका रहेकाछन् ।
मोरङ क्षेत्र नम्बर ४ मा कुल मतदाता संख्या १ लाख १० हजार ९३ मतदाता रहेकाछन् । २८ वटा मतदानस्थल र ६७ वटा मतदान केन्द्र रहेको सो क्षेत्रको प्रदेश १ तर्फ ५७ हजार ३ सय ९०, प्रदेश २ तर्फ ५२ हजार ७ सय ३ मतदाता रहेका छन् ।
यस क्षेत्रमा नेकपा माओवादीका अमनलाल मोदी, नेकपा एमालेबाट विनोद ढकाल प्रतिनिधीसभातर्फ प्रतिस्पर्धामा र प्रदेश सभामा कांग्रेसका गुरुराज घिमिरे, भीम पराजुली उम्मेदवार रहेका छन् । मोरङ क्षेत्र नम्बर ४ मा कटहरी गाँउपालिका, ग्रामथान गाँउपालिका, बेलबारी नगरपालिका, विराटनगर महानगरपालिकाका वडाहरु रहेकाछन् ।
त्यसैगरी, मतदाता संख्यामा मोङगको सबैभन्दा सानो भूगोल क्षेत्र नम्बर ५ हो । भारतीय सीमा क्षेत्रमा जोडिएको क्षेत्रमा ४४ वटा मतदानस्थल र १ सय १५ वटा केन्द्र रहेको छ । यस क्षेत्रको प्रदेश १ तर्फ ४७ हजार ४ सय ५५ र प्रदेश २ तर्फ ५३ हजार ३९ मतदाता गरि कुल १ लाख ४ सय ९४ मतदाता रहेका छन् ।
दलीय गठबन्धन अन्र्तगत माओवादी नेता शिवकुमार मण्डल प्रतिनीधिसभातर्फ र प्रदेश सभामा कांग्रेसका अमृत अर्याल र गयानन्द मण्डल प्रतिस्पर्धामा रहेकाछन् । यस क्षेत्रमा जसपाका राजकुमार यादव प्रतिनीधिसभामा र जयराम यादव प्रदेश सभामा रहेकाछन् । त्यसैगरि, एमालेका सन्तोष साहपनि सोही क्षेत्रको प्रदेश सभामा स्पर्धा गरिरहेका छन् । यस क्षेत्रमा जहँदा गाँउपालिका, धनपालथान गाँउपालिका, रङ्गेली नगरपालिका, र विराटनगर महानगरपालिकाका विभिन्न वडा पर्दछ ।
प्रदेश निर्वाचन कार्यालयका अनुसार मोरङमा कुल ३ सय ६ वटा मतदानस्थल, ८ सय ३९ वटा मतदान केन्द्र रहेका छन् । त्यसैगरी, यस जिल्लाका ६ वटा क्षेत्रमा ३ लाख ७४ हजार ३ सय २६ महिला र ३ लाख ६१ हजार १ सय ९३ पुरुष मतदाता रहेको कार्यालयले जनाएको छ ।
भर्खरै
लोकप्रिय
