प्युठान – प्रतिनिधिसभाका लागि एकमात्र निर्वाचन क्षेत्र रहेकाे प्युठानमा नेकपा एमालेकाे तर्फबाट सूर्यबहादुर थापा र गठबन्धनकाे तर्फबाट राष्ट्रिय जनमाेर्चाकी दुर्गा पाैडेलबीच प्रतिष्पर्धा हुँदैछ ।
मंसिर ४ गतेका लागि तय भएकाे निर्वाचनका लागि एमाले पोलिटब्युरो सदस्यसमेत रहेका थापा र राजमाे उपाध्यक्ष तथा सांसद् पाैडेलबीच कडा प्रतिष्पर्धा हुने देखिन्छ ।
बाग्लुङपछि राजमोकाे बलियो क्षेत्र मानिएकाे प्युठानमा एमालेको जनाधार पनि बलियो छ । गत स्थानीय तहकाे निर्वाचन र वर्तमान राजनीतिक परिवेश हेर्ने हाे भने, यसअघि प्युठानबाटै सांसद् बनेकी पाैडेललाई यसपालि जित्न सजिलो छैन ।
गठबन्धनका कारण प्युठानमा सत्ताधारि दल नेपाली कांग्रेस, एकीकृत समाजवादी, नेकपा माओवादी केन्द्र र राजमाे एक ठाउँमा छन् भने एमाले एक्लो छ ।
तर, गत स्थानीय तहकाे निर्वाचन र अहिले कांग्रेसले देखाएकाे व्यवहार हेर्ने हाे भने त्यहाँ गठबन्धनकाे पूर्ण पालना हुनेमा विश्वस्त हुने अवस्था छैन । यसकाे प्रमुख कारण हो- ‘कांग्रेसका नेता डा.गाेविन्दराज पाेखरेलले गरेकाे दुर्गालाई भाेट नदिने घाेषणा ।’
सिट बाडफाँटका क्रममा गठबन्धनले प्युठान र बाग्लुङ राजमाेलाई दिने करिब-करिब टुङ्गाे लगाइरहँदा कांग्रेसका डा.पाेखरेलले भने आफूले राजमाेकी दुर्गाकाे लागि भाेट नमाग्ने कांग्रेसका उम्मेदवारका लागि मात्र भाेट माग्ने सामाजिक सञ्जालमार्फत घाेषणा गरेका थिए ।
डा.पाेखरेल उनै नेता हुन् जाे २०७४ सालकाे निर्वाचनका पाैडेलसँग पराजित भएका थिए । तत्कालीन बाम गठबन्धन विशेषत:एमालेकाे समर्थनमा जितेकी पाैडेल अहिले साेही एमालेका सूर्यसँग प्रतिष्पर्धा गर्दैछन् ।
गठबन्धनका कारण कांग्रेसबाट टिकट नपाएका राष्ट्रिय याेजना आयाेगका पूर्वउपाध्यक्षसमेत रहेका उनकाे राजमाेका नेता तथा कार्यकर्ताहरूले चर्काे विराेध गरेका थिए । चुनाव नजिकिँदै छ- उनले दुर्गालाई साथ दिन्छन् या दिँदैनन् हेर्न अझै बाँकी नै छ ।
कुल ९ वटा स्थानीय तह रहेकाे प्युठानमा नाैबहिनी गाउँपालिकाका दुवै पदमा एमाले, सरुमारानी गाउँपालिका एमालेकाे प्यानल नै विजयी भएकाे छ भने झिमरुकमा
अध्यक्षमा माओवादी र उपाध्यक्षमा कांग्रेस, प्युठान नगरपालिका मेयरमा माओवादी र उपमेयरमा कांग्रेस, स्वर्गद्वारी नगरपालिका मेयरमा कांग्रेस र उपमेयरमा राजमाे,
गाैमुखी गाउँपालिका प्रमुखमा कांग्रेस, उपाध्यक्षमा माओवादी, माण्डवी गाउँपालिका अध्यक्षमा माओवादी र उपाध्यक्षमा कांग्रेस र ऐरावती गाउँपालिका अध्यक्ष कांग्रेस र उपाध्यक्षमा राजमाे विजयी भएकाे थियाे ।
गएको स्थानीय तह निर्वाचनको नतिजा हेर्दा एमालेभन्दा सत्ता गठबन्धन ११ हजार मतले अघि छ । प्युठानमा एमालेले कुल ३९ हजार ८७७ मत प्राप्त गरेको छ । जिल्लाका २० वटा वडा जितेको कांग्रेसले २१ हजार २२ मत पाएको छ । १० वटा वडा जितेको माओवादी केन्द्रले १५ हजार ७४६ मत र १० वटै वडा जितेको जनमोर्चाले १३ हजार ८५४ मत प्राप्त गरेको छ । त्यसैगरी दुई वटा वडा जितेको विप्लव समूहले १ हजार ४१७ मत, कुनै पनि वडा जित्न नसकेको एकीकृत समाजवादीले १ हजार ३२२ मत पाएको थियो ।
२०७४ सालकाे निर्वाचनमा सत्कालीन बाम गठबन्धनकाेतर्फबाट लाेकप्रिय मतका साथ विजयी भएकी पाैडेल राजमाे महामन्त्री माेहन विक्रम सिंहकी पत्नी हुन् ।
जनमाेर्चाले पकड कायम गरेकाे महामन्त्री सिंहकाे जन्मथलाे झिमरुक गाउँपालिकामा गत स्थानीय तहमा नेकपा माओवादी केन्द्र र नेपाली कांग्रेसले जितेकाे छ । त्यहाँ माओवादी र कांग्रेसबीच गठबन्धन थियाे ।
यता, प्रदेशसभातर्फ दुई वटा निर्वाचन क्षेत्र रहेकाे प्युठानकाे क्षेत्र नम्बर ‘क’मा गठबन्धनकाे तर्फबाट नेता कृष्ण अधिकारी ‘प्रकाश’ उम्मेदवार छन् भने उनकाे प्रतिष्पर्धी एमालेकाे तर्फबाट तुलसीराम शर्मा रहेका छन् ।
एमालेका निवर्तमान जिल्ला अध्यक्षसमेत रहेका शर्मा प्युठानका लाेकप्रिय नेता मानिन्छन् भने अधिकारी पनि लोकप्रिय छन् ।
यता, क्षेत्र नम्बर ‘ख’मा नेकपा एमालेकाे तर्फबाट हरिप्रसाद रिजाल उम्मेदवार रहेका छन् भने गठबन्धनकाे तर्फबाट कांग्रेसका राेज राणा’सराेज थापा’ उम्मेदवार छन् ।
यी दुवै प्रतिष्पर्धी प्युठानमा लाेकप्रिय छन् । युवा पुस्ताकाे प्रतिनिधित्व गर्दै आएका राणा नेपाली कांग्रेस प्युठान क्षेत्र नम्बर २ का सभापति हुन् भने एमालेका रिजाल नेकपा एमालेका केन्द्रीय सदस्य तथा प्युठान सह-इन्चार्ज हुन् ।
यसअघि, २०७४ सालकाे निर्वाचनमा प्युठान ‘क’ बाट प्रदेशसभा सदस्यमा निर्वाचित भएका उनी लुम्बिनी प्रदेशका पूर्व सहरीविकास मन्त्रीसमेत हुन् ।
प्युठान ‘ख’ बाटै स्वतन्त्र उम्मेदवार माधव केसी पनि उठेका छन् । नेतृत्व तहमा युवा पुस्ता सहभागी हुनुपर्ने भिजनसहित उम्मेदवारी दिएकाे बताउने उनले कांग्रेसका नेता राणाकाे मत काट्ने सम्भावना देखिन्छ ।
भर्खरै
लोकप्रिय
