खसेको मतबारे जानकारी दिने प्रणालीमा समस्या

मोरङ – प्रदेश निर्वाचन कार्यालय–१ विराटनगरले प्राविधिक समस्याका कारण प्रदेशभरबाट खसेको मत प्रतिशतबारे प्रस्ट जानकारी आउन नसकेको जनाएको छ।

विराटनगरस्थित कार्यालयका शाखा अधिकृत महेशकुमार ठाकुरका अनुसार मोरङसँगै अन्य जिल्लाबाट खसेको मतबारे जानकारी दिने प्रणालीमा समस्या आएको हो।

प्रदेश निर्वाचन कार्यालय र अन्य जिल्लाबीच मत खसेको विषयमा तत्काल प्रतिशतसहित संख्या जानकारी गराउने इभेन्ट ट्रयाकिङ एसएमएस प्रणालीमा आइतबार बिहानबाट समस्या आएको अधिकृत ठाकुरले जानकारी दिए।

यसबारे सम्बन्धित निकायमा जानकारी भएको बताएका ठाकुरले अहिलेसम्म प्रदेशभर कति मत खसेको भन्नेबारे प्रस्ट आँकडा संकलन गर्न कठिनाइ भएको उल्लेख गरे। यद्यपि, निर्वाचन अधिकृतको कार्यालयका कर्मचारी, सुरक्षा निकाय तथा अनुगमन टोलीसँग फोनमार्फत जानकारी लिएर आँकडा संकलन कार्य हुँदै आएको कार्यालयले जनाएको छ।

मोरङमा अपराह्न साढे ३ बजेसम्म ५४ देखि ५५ प्रतिशत मत खसेको कार्यालयले जनाएको छ। हालसम्म प्रदेश १ का १४ वटा जिल्लामा कति मत खसेको भन्ने विषय यकिन आँकडा आइनसकेको कार्यालयले जनाएको छ।