भौतिकशास्त्री स्टीफन हकिङ्गको शनिबार क्याम्ब्रिजमा फ्युनेलर (अन्तिम संस्कार) हुने भएको छ ।
मार्च १४ मा निधन भएका चर्चित भौतिकशास्त्री हकिङ्गको क्याम्ब्रिजको युनिभर्सिटी चर्च ग्रेट सेन्ट मेरीमा स्थानीय समय अनुसार दिउँसो २ बजे फ्युनेरल हुने तय भएको बिबिसीले उल्लेख गरेको छ ।
सैद्धान्तिक भौतिकशास्त्री प्रोफेसर हकिङ्गको अस्तु आउँदो जुनमा वेष्टमिनिस्टरमा रहेको सर आइज्याक न्युटनको चिहान नजिकै गाड्ने तय भएको छ ।
सन् २०१४ को डिसेम्बरमा ओडिनको लेस्टर स्क्वायरमा आफ्नो जीवनीमाथि बनेको चलचित्र द थेवरी अफ एभरिर्थिङका प्रिमियरको क्रममा अभिनेता एडी रेडम्यानको साथमा । तस्बिर : जोएनी डेविडसन/सिल्भरहब/रेक्स/सटरस्टक
हकिङ्गको फ्युनेरल शनिबार दिउँसो एक निजी कार्यक्रमका बिच गरिने तय भएको छ । यसका लागि परिवारका सदस्य, साथी तथा सहकर्मीसहित झण्डै पाँच सयजनालाई निम्ता गरिएको छ । तर समारोहमा धेरै मानिस उपस्थित हुने अनुमान छ ।
फ्युनेरलका लागि क्याम्ब्रिजमा तयारी पूरा भएको त्यहाँका अधिकारीले बताएका छन् । सैद्धान्तिक भौतिकशास्त्री हकिङ्गको मार्च १४ बुधबार ७६ वर्षको उमेरमा निधन भएको हो ।
वैज्ञानिक हकिङ्गले ब्ल्याक होल र रिलेटिभिटी सम्बन्धी गरेको कामलाई भौतिक विज्ञानमा ब्रेक–थ्रु का रुपमा लिने गरिन्छ ।
उनले ‘अ ब्रिफ हिस्ट्री अफ टाइम’ सहितका धेरै पुस्तक लेखेका छन् । उनका लुसी, रोबर्ट र टिम गरी तीन सन्तान रहेका छन् ।
फ्याक्ट फाइल : स्टीफन हकिङ्ग
जन्म : ८ जनवरी, १९४२
निधन : १४ मार्च, २०१८
जन्मस्थान : अक्सफोर्ड, इंग्ल्याण्ड
सन् १९५९ मा प्रकृति विज्ञान अध्ययनका लागि अक्फोर्ड विश्वविद्यालयमा भर्ना, उनले क्याम्ब्रिज विश्वविद्यालयबाट विद्यावारिधी गरेका हुन् ।
सन् १९६३ मा गम्भीर रोग मोटर न्युरोनबाट ग्रस्त, डाक्टरले दुई वर्षमात्रै बाँच्ने भनेका थिए ।
उनले ब्ल्याक होल सम्बन्धी प्रशिद्ध सिद्धान्त सन् १९७४ मा ‘हकिङ्ग रेडिएसन’ को नाममा प्रतिपादन गरे ।
उनको ‘अ ब्रिफ हिस्ट्री अफ टाइम’ पुस्तक सन् १९८८ मा प्रकाशित भयो । यो पुस्तक १०, ०००, ००० भन्दा बढी प्रति बिक्री भएको छ ।
उनको जीवनीमा आधारित भएर सन् २०१४ मा ‘द थेवरी अफ एभरिथिङ’ नामक चलचित्र निर्माण गरिएको थियो । यसमा एडी रेडम्यानले हकिङ्गको भूमिका निभाएका छन् । यो भूमिकाका लागि उनले ओस्कार अवार्ड पाए ।
पहिलो श्रीमती ज्यानी र छोराका साथमा हकिङ । तस्बिर : फ्र्याङ्क मार्टिन/गार्डियन
भर्खरै
लोकप्रिय
