सिमकोट – नेपाली सेनाले नाम्खा गाउँपालिका–६ को हिमालपारीको गाउँ लिमीमा सेक्सन अप्रेटिङ बेस स्थापना गरेको छ। उत्तरी क्षेत्रको निर्वाचन सुरक्षा संवेदनशीलतालाई लक्ष्य गर्दै नेपाली सेनाले सो बेस स्थापना गरेको हो।
बराहदल गुल्म रानी बलका गुल्मपति सुरेन्द्र श्रेष्ठले लिमीको हल्जीमा निर्वाचनको सुरक्षालाई ध्यानमा राखी सेक्सन अप्रेटिङ बेस स्थापना गरिएको बताए।
सेनाको जम्दारको नेतृत्वमा सो बेस स्थापना गरिएको हो। बेसका सुरक्षाकर्मीले निर्वाचनका हरेक गतिविधि निगरानीका साथ सुरक्षा प्रदान गर्नेछन्।
उनका अनुुसार सो बेसले लिमीका तीन वटै मतदान केन्द्र तिल, हल्जी र जाङका मतदान केन्द्रको सुरक्षा प्रदान गर्नुका साथै आवश्यक परे नाम्खा गाउँपालिकाको समेत सुरक्षा हेर्नेछ। बेसमा रहने सेनालाई सेनाको हेलिकोप्टरबाट लिमी उतारिएको थियो।
स्थानीय निर्वाचनमा पनि सो बेस लिमीमा स्थापना गरिएको थियो। यता, जिल्लाको दक्षिणी क्षेत्रका गाउँपालिकाको निर्वाचन सुरक्षाका लागि सर्केगार्ड गाउँपालिकाको केन्द्र सर्केगार्डमा कम्पनी अप्रेटिङ बेस स्थापना गरिएको छ।
सहसेनानीको नेतृत्वमा उक्त बेस यसअघि नै स्थापना गरिएको थियो। जसले सर्केगार्ड, चंखेली, अदानचुली र ताँजाकोट गाउँपालिकाका निर्वाचन गतिविधिको सुरक्षा प्रदान गर्नेछ।
भर्खरै
लोकप्रिय
