इतिहासकै तातो दशक बन्ने तर्फ विश्वको तापक्रम

अ +

अ

अ -

पछिल्लो दशक इतिहासकै तातो वा औषत तापमान वृद्धि बढी भएको दशक बन्ने अवस्थामा पुगेको वैज्ञानिकले बताएका छन् ।

विश्वको तापक्रम सम्बन्धी तथ्यांक राख्न थालिएयताकै तातो दशक बन्ने अवस्थामा अहिलेको दशक पुगेको हो । सन् १८५० देखि तापमानसहितको मौसमी गतिविधिको तथ्यांक राख्न थालिएको हो ।

मौसमविदले अबका पाँच वर्ष हरेक वर्षको तापक्रम औद्योगिक युग अघिका वर्षको भन्दा एक डिग्री सेल्सियस वा त्यो भन्दा बढी हुने अनुमान गरेका छन् ।

अबको पाँच वर्षमा कुनै एक वर्ष विश्वको औषत तापमान वृद्धि १.५ डिग्री सेल्सियस भन्दा बढी हुन सक्ने सम्भावना धेरै रहेको वैज्ञानिकले उल्लेख गरेका छन् । जलवायु परिवर्तनको गम्भीर असरको कारण यस्तो भएको हो ।

मौसम वैज्ञानिकले गरेको अनुमान मिल्यो भने सन् २०१४ देखि २०२३ सम्मको दशक विश्वको इतिहासमा १५० वर्ष यताकै तातो दशक बन्ने छ ।

बेलायतको द मेट अफिसले गरेको पूर्वानुमानमा अबको पाँच वर्ष हरेक वर्ष औषत तापमान वृद्धि एक डिग्री भन्दा बढी देखिनु चिन्ताको विषय हो ।

कार्यालयका अनुसार सन् २०१५ त्यो पहिलो वर्ष हो, जुन वर्ष पृथ्वीको सतहको औषत तापमान वृद्धि औद्योगिक युग पछि एक डिग्री भन्दा माथि पुग्यो । सन् १९५० देखि १९०० सम्म एक डिग्रीलाई औषत तापमान वृद्धि मानिँदै आएको थियो ।

सन् २०१५ यताका वर्षमा औषत तापमान वृद्धि एक डिग्री वा त्यो भन्दा माथि रहेको देखिएको छ । मेट अफिसले अबको पाँच वर्ष औषत तापमान वृद्धि निरन्तर कायम रहने पूर्वानुमान गरेको छ ।

दीर्घकालको तापमान सम्बन्धी पूर्वानुमान गर्ने मेट अफिसका वैज्ञानिक प्रोफेसर एडम स्काइफले विश्वको तापमान तीव्र गतिमा बढिरहेको बताएका छन् ।

पेरिस जलवायु सम्झौतामा विश्वको तापमान वृद्धि १.५ डिग्रीमा सीमित गर्ने लक्ष्य तोकिएको छ ।