मेसीका बुबालाई के भएको हो?

काठमाडौँ– अर्जेन्टिनाका स्टार फुटबलर लियोनेल मेसीका बुबा तथा ‘एजेन्ट’ जर्ज मेसीको स्वास्थ्यलाई लिएर अहिले सामाजिक सञ्जालमा अनेकन अफवा फैलाएपछि परिवारले आफ्नो धारणा सार्वजानिक गरेको छ।

मेसी परिवारले एक विज्ञप्ति जारी गर्दै ६८ वर्षीय जर्ज मेसीको स्वास्थ्यमा समस्या देखिएको र हाल उनको उपचार भइरहेको जनाएको छ। तर उनलाई के भएको हो भनेर खुलेको छैन। परिवारद्वारा जारी विज्ञप्तिमा जर्ज मेसीको स्वास्थ्य अवस्था हाल स्थिर रहेको र उनको स्वास्थ्यमा क्रमिक सुधार भइरहेको जनाइएको छ।

यद्यपि उनलाई लागेको रोग वा स्वास्थ्य समस्याको वास्तविक प्रकृतिकाबारेमा भने परिवारले खुलाएको छैन।

रोयटर्सका अनुसार जर्ज मेसी हाल अर्जेन्टिनाकै एक अस्पतालमा भर्ना भई उपचार गराइरहेका छन्।

सामाजिक सञ्जालका अफवाहप्रति परिवारको आक्रोश

जर्ज मेसीको स्वास्थ्यलाई लिएर सामाजिक सञ्जाल र केही सञ्चारमाध्यमहरूमा उनको मृत्युसमेत भइसकेको जस्ता गलत र भ्रामक अफवाहहरू फैलिएपछि मेसी परिवारले आपत्ति जनाएको छ। ‘पछिल्ला केही घण्टाहरूमा फैलिएका विभिन्न अफवाह र अड्कलबाजीप्रति मेसी परिवार गहिरो दुःख र असन्तुष्टि व्यक्त गर्दछ। एउटा नितान्त व्यक्तिगत र पारिवारिक मामिलामा केही मानिसहरूले देखाएको असंवेदनशीलता र सम्मानको कमी निन्दनीय छ’, विज्ञप्तीमा भनिएको छ।

परिवारले जर्ज मेसीको स्वास्थ्य सम्बन्धी सही जानकारी केवल उनका नजिकका सदस्यहरूसँग मात्र सुरक्षित रहेको स्पष्ट पार्दै आधिकारिक च्यानल बाहेकका अन्य कुनै पनि अपुष्ट समाचारमा विश्वास नगर्न प्रशंसक र सञ्चारमाध्यमहरूलाई आग्रह गरेको छ। ‘यस्तो समयमा हामी उत्तरदायित्व, विवेक र मानवताको माग गर्दछौँ’ विज्ञप्तिमा भनिएको छ।

मेसी भावुक भएपछि अनेकन अड्कलबाजी

फिफा विश्वकपका दौरान अल्जेरिया विरुद्धको खेलमा अर्जेन्टिनालाई ३-० को जित दिलाउने क्रममा ह्याट्रिक गरेपछि लियोनेल मेसी मैदानमै निकै भावुक बनेका थिए। पहिलो गोल गरेपछि मेसीले आफ्नो जर्सीले आँसु पुछेका थिए।

खेलपछिको पत्रकार सम्मेलनमा मेसीले आफ्नो भावुकता फुटबलसँग नभई व्यक्तिगत कारणसँग जोडिएको खुलासा गरेका थिए। मेसीले भनेका थिए, ‘म पछिल्ला केही दिनदेखि फुटबल बाहेकका व्यक्तिगत कारणले निकै कठिन र जटिल समयबाट गुज्रिरहेको थिएँ। तर म सम्पूर्ण टिम र साथीहरूलाई धन्यवाद दिन चाहन्छु, जसले मलाई पहिले जस्तै बलियो बनाइराख्न साथ दिए।’

हाल जर्ज मेसीको स्वास्थ्य सम्बन्धि कुनै पनि नयाँ आधिकारिक जानकारी आएमा परिवारले उपयुक्त समयमा जानकारी गराउने बताएको छ।

मेसीको रुवाइको कारण उनको बुबाको स्वास्थनै भएको जनाइएको छ।