‘सानुभाइ’ भनेर चिनिने युवराज गुरुङ पक्राउ

काठमाडौँ- ‘सानुभाइ’ भनेर चिनिने युवराज गुरुङ पक्राउ परेका छन्।

गुण्डागर्दीका गतिविधिमा संलग्न रहेको आरोपमा उनलाई नियन्त्रणमा लिइएको प्रहरीले जनाएको छ। प्रहरीकाअनुसार गुरुङ यसअघि पनि पटक-पटक पक्राउ पर्ने र छुट्ने गर्दै आएका थिए।

०८० असारमा ठमेल स्थित क्लब ओम्नियाका सञ्चालकलाई कुटपिट गरेको आरोपमा पक्राउ पर्दा उनलाई हत्कडीसहित सार्वजनिक रूपमा घुमाइएको थियो।

पछि जिल्ला प्रशासन कार्यालय काठमाडौँले अभद्र व्यवहारको कसुरमा उनलाई १० हजार रुपैयाँ धरौटीमा रिहा गरेको थियो। त्यसयता पनि उनी कुटपिट र असुलीका घटनामा संलग्न हुँदै पुनः पक्राउ पर्ने क्रम जारी रहेको प्रहरीको भनाइ छ।