काठमाडौँ – कृषि, वन तथा पर्यावरणमन्त्री गीता चौधरीले सरकारको दीर्घकालीन प्राथमिकता रासायनिक मल नभएको बताएकी छन्।
शुक्रबार कृषि तथा प्राकृतिक स्रोत समितिको बैठकमा बोल्दै मन्त्री चौधरीले रासायनिक मलको प्रयोगलाई क्रमशः घटाउँदै जैविक र प्राङ्गारिक मलको प्रवर्द्धनमा सरकार केन्द्रित हुने बताएकी हुन्।
उनले रासायनिक मल नेपालमा उत्पादन नहुने र अन्तर्राष्ट्रिय वस्तु भएकाले यसको दिगो व्यवस्थापनका लागि परराष्ट्र, अर्थ र कृषिलगायतका सरोकारवाला मन्त्रालयहरूसँग समन्वय गरेर अगाडि बढ्ने प्रतिबद्धता व्यक्त गरिन्।
विगतका केही महिनामा रुस–युक्रेन युद्धका कारण रासायनिक मलको आपूर्तिमा विश्वव्यापी प्रभाव परेको उल्लेख गर्दै मन्त्री चौधरीले प्रधानमन्त्रीको नेतृत्वमा भएका द्रुत प्रयासका कारण हाल मलको उपलब्धता सहज भएको दाबी गरिन्।
उनका अनुसार आगामी ३ देखि ४ महिनासम्मका लागि मलको मौज्दात सुनिश्चित भइसकेकाले अब सरकार वैकल्पिक मार्गचित्रतर्फ लाग्ने तयारीमा छ।
सरकारले जैविक र प्राङ्गारिक मल उत्पादनका लागि बजेटमा उल्लेख्य वृद्धि गरेको पनि उनले बताइन्।
उनले भनिन्, ‘मेरो प्राथमिकता स्पष्ट छ। दीर्घकालीन रूपमा हाम्रो लक्ष्य रासायनिक मलमा निर्भर रहने होइन। तर यसलाई एकैचोटी विस्थापन गर्न पनि सम्भव छैन।’
कृषि र वन मन्त्रालयको नेतृत्व सम्हालेपछि दुवै क्षेत्रको समन्वयमा काम भइरहेको बताउँदै उनले माटोको गुणस्तर सुधार र वनजन्य स्रोतको उपयोगलाई एकीकृत रूपमा अगाडि बढाइने उल्लेख गरिन्।
भर्खरै
लोकप्रिय
