- म्याग्दीको धवलागिरि आधारभूत विद्यालयमा तीन शिक्षक-कर्मचारी र तीन विद्यार्थी मात्र रहेको स्थिति छ।
- बसाइँसराइ वृद्धि र जन्मदर घट्नाले विद्यालयको विद्यार्थी संख्या कम हुँदै गएको प्रधानाध्यापकले बताएका छन्।
- अन्नपूर्ण गाउँपालिकाले विद्यार्थी संख्या न्यून भएका विद्यालयहरूमा कक्षा घटुवा र दरबन्दी व्यवस्थापनको नीति लिँदैछ।
म्याग्दी- म्याग्दीको अन्नपूर्ण गाउँपालिका–४ भालेबासमा रहेको धवलागिरि आधारभूत विद्यालयमा विद्यार्थी र शिक्षक–कर्मचारीको सङ्ख्या बराबर भएको छ ।
विसं २०४० मा स्थापना भएको र कक्षा ३ सम्म पठनपाठन हुने यस विद्यालयमा हाल कुल ३ जना मात्र विद्यार्थी अध्ययनरत छन् भने शिक्षक र कर्मचारीको सङ्ख्या पनि ३ नै रहेको छ ।
विद्यालयको कक्षा १ र २ मा विद्यार्थी सङ्ख्या पूर्ण रूपमा शून्य छ ।
बालकक्षा र कक्षा ३ मा मात्रै विद्यार्थी
हाल विद्यालयको बालकक्षामा जेसिका खड्का तथा कक्षा ३ मा नेलसन रोका र श्रीसा खड्का गरी ३ जना विद्यार्थी मात्र भर्ना भएका छन् ।
विद्यालयमा स्थायी दरबन्दीका शिक्षक एवं प्रधानाध्यापक शान्ति राम्जाली, बालशिक्षा सहजकर्ता शिखा बोहोरा क्षेत्री र विद्यालय सहयोगी सुर्जना रोका कार्यरत हुनुहुन्छ ।
विद्यार्थी सङ्ख्या घट्दै गएपछि गत वर्ष गाउँपालिकाले यहाँको एक जना शिक्षकको दरबन्दी समेत कटौती गरेको थियो ।
बसाइँसराइ र घट्दो जन्मदर मुख्य कारण
प्रधानाध्यापक राम्जालीका अनुसार तीव्र बसाइँसराइ र घट्दो जन्मदरका कारण विद्यालयमा यो अवस्था आएको हो ।
विद्यालयको सेवा क्षेत्रभित्र पर्ने भालेबासमा १५ र कोप्चेपानीमा १० घरपरिवार मात्र बसोबास गर्छन् ।
विसं २०७२ सम्म विद्यालयमा १५ देखि २० जनासम्म विद्यार्थी हुने गरे तापनि पछिल्ला वर्षहरूमा नयाँ बच्चा जन्मने दर घटेको र गाउँ छाडेर अन्यत्र जाने क्रम बढेकाले विद्यालय सुनसान बन्न पुगेको हो ।
बाढीको चपेटा र वर्तमान चुनौती
यसअघि विसं २०७५ मा कोप्चेपानीमा रहेको विद्यालय भवनलाई कालीगण्डकीको बाढीले बगाएपछि विद्यालय भालेबासमा स्थानान्तरण गरिएको थियो ।
हाल विद्यालयमा सुविधायुक्त भवन, शौचालय र बालमैत्री कक्षाकोठा भए पनि विद्यार्थी नै नहुँदा समस्या परेको छ । स्थानीयवासी तुलाराम बुढाका अनुसार छिमेकी गाउँ गाडपार र काभ्रेका विद्यालय पुग्न बालबालिकालाई करिब एक घण्टा पैदल हिँड्नुपर्ने बाध्यता छ ।
त्यसैले, गाउँमा भएका थोरै बालबालिकालाई पनि शिक्षाको अधिकारबाट वञ्चित हुन नदिन सङ्ख्या कम भए पनि विद्यालय सञ्चालन गरिरहनु परेको उनले बताए।
गाउँपालिकाको आगामी नीति
अन्नपूर्ण गाउँपालिकाअन्तर्गतका ठाडा, किन्दु, स्वाँत, घराप र चित्रेका आधारभूत विद्यालयहरूमा पनि विद्यार्थी सङ्ख्या निकै न्यून छ ।
भौगोलिक विकटता र छरिएका बस्तीका कारण विद्यालयहरूमा यो समस्या देखिएको भन्दै गाउँपालिकाका अध्यक्ष भारतकुमार पुनले अब विद्यार्थी सङ्ख्या कम भएका विद्यालयहरूमा कक्षा घटुवा (डाउनग्रेड) गर्ने र दरबन्दी व्यवस्थापन गर्ने नीति लिइने जानकारी दिए ।
भर्खरै
लोकप्रिय
