- जैमिनी नगरपालिकाले पहिचान गरिएका १८ सुकुम्वासी परिवारलाई घर र जग्गासहित लालपुर्जा उपलब्ध गराएको छ ।
- सुकुम्वासी समस्या समाधान गर्न अघिल्लो कार्यकालदेखि पहल सुरु भएको र प्रक्रिया अझै बाँकी रहेको छ ।
- नगरपालिकाले विपद्का कारण विस्थापित र आर्थिक समस्यामा रहेका ४४ परिवारलाई समेत घर निर्माण गरिदिएको छ ।
ढोरपाटन- बागलुङको जैमिनी नगरपालिकाले पहिचान भएका १८ सुकुम्वासी परिवारलाई घर र जग्गासहित लालपुर्जा उपलब्ध गराएको छ ।
जग्गा खरिद गरी घर निर्माण गरेर लालपुर्जा हस्तान्तरण गरेसँगै नगरभित्रको सुकुम्वासी समस्या समाधान भएको छ ।
नगर उपप्रमुख हरिहर शर्माका अनुसार सुकुम्वासी समस्या समाधानका लागि अघिल्लो कार्यकालदेखि नै पहल सुरु गरिएको थियो ।
सबै सुकुम्वासी परिवारले घर, जग्गा र लालपुर्जा पाइसकेको भए तापनि नगरपालिकालाई औपचारिक रूपमा सुकुम्वासीमुक्त घोषणा गर्न भने राष्ट्रिय भूमि आयोगमार्फत प्रक्रिया पूरा हुन बाँकी रहेको छ ।
नागरिकलाई सुरक्षित आवास उपलब्ध गराउनु राज्यको दायित्व भएकाले नगरपालिकाले सुकुम्वासीको पहिचान, जग्गा खरिद, घर निर्माण र लालपुर्जा वितरणको काम गरेको उपप्रमुख शर्माले बताए ।
नगरपालिकाले सुकुम्वासीका साथै प्राकृतिक विपद्का कारण विस्थापित भएका तथा आर्थिक अभावका कारण घर बनाउन नसकेका ४४ परिवारका लागि पनि घर निर्माण गरिदिएको छ ।
यसका लागि कार्यविधि बनाएर घरविहीन परिवारलाई तीन लाख रुपैयाँ, विपद्का कारण घर गुमाएका परिवारलाई दुई लाख ५० हजार रुपैयाँ र आर्थिक अभावका कारण घर पुनर्निर्माण गर्न नसकेका परिवारलाई दुई लाख रुपैयाँ सहयोग उपलब्ध गराइएको छ ।
नगरपालिकाले पहिलो चरणमा तीन पुस्तासम्म घर नभएका परिवारका लागि आवास निर्माण गरेको थियो ।
त्यस्तै, दोस्रो चरणमा विपद् वा आर्थिक समस्याका कारण आफ्नै घरमा बस्न नसकी अरूकै घरमा आश्रित रहेका परिवारलाई घर निर्माण गरेर बसोबासको व्यवस्था मिलाएको छ ।
घर प्राप्त गरेपछि स्थानीय उषा नेपालीले नगरपालिकाको सहयोगले स्थायी रूपमा बस्ने ठाउँको चिन्ता हटेको बताइन् ।
समस्यामा परेका बेला नगरपालिकाले घर बनाइदिएपछि गरिब र विपन्नको समस्या सम्बोधन भएको अनुभूति भएको र अब बाँकी आवश्यकता मेहनत गरेर पूरा गर्न सकिने विश्वास उनले व्यक्त गरिन् ।
भर्खरै
लोकप्रिय
