- नेकपाले सरकारद्वारा मन्त्रालयगत बजेट विवरण समयमै सार्वजनिक नगरेको भन्दै पारदर्शितामाथि प्रश्न उठाएको छ।
- प्रमुख सचेतक युवाराज दुलालले विनियोजन विधेयक पेश भएदेखि १८ दिन बित्दा पनि विवरण उपलब्ध नभएकोमा आपत्ति जनाएका छन्।
- मन्त्रालयगत बजेटमा सुधार गर्दै गाइँगुइँ भएको भन्दै उनले सुशासन र पारदर्शिताको लागि सरकारको ध्यानाकर्षण गराए।
काठमाडौँ – नेकपाले विनियोजन विधेयक संसदमा पेश भएको १८ दिन बितिसक्दा समेत मन्त्रालयगत बजेट विवरण सार्वजनिक नगरिएको भन्दै सरकारको पारदर्शितामाथि प्रश्न उठाएको छ ।
सोमबार प्रतिनिधि सभामा प्रमुख सचेतक युवाराज दुलालले अर्थमन्त्रीले संसदमा विनियोजन विधेयक पस्तुत गरेलगत्तै मन्त्रालयगत कार्यक्रम र बजेटको विस्तृत विवरण सार्वजनिक हुनुपर्ने भए पनि धेरैसम्म नभएको भन्दै आपत्ति जनाएका हुन्।
विनियोजन विधेयकमा करका दर हेरफेर भएजस्तै मन्त्रालयगत बजेटमा समेत थपघट भइरहेको गाइँगुइँ सुनिएको भन्दै त्यसलाई सुशासन मान्न नसकिने बताए।
उनले बजेट निर्माण र कार्यान्वयन प्रक्रियामा पूर्ण पारदर्शिता कायम गर्न तथा सांसदहरूलाई मन्त्रालयगत बजेटको विवरण समयमै उपलब्ध गराउन सरकारको ध्यानाकर्षण गराए।
उनले भने, ‘विनियोजन विधेयक प्रश्तुत भएको १८ दिन भइसक्यो । किन आजसम्म किताब आउँदैन ? विस्तृत अध्ययनबिनै संशोधन प्रस्ताव र धारणा राख्नुपर्ने अवस्था सिर्जना भएको छ । भोलि छलफल हुने केही मन्त्रालयको बजेट विनियोजन सम्बन्धी पुस्तकसमेत अझै उपलब्ध भएको छैन । कार्यक्रम पुस्तिका नपाइकनै खर्च कटौती प्रस्तावदर्ता गर्न बाध्य भएका छौं । विनियोजन विधेयक पेश पछि पनि मन्त्रालयमा बजेट थप्ने, घटाउने काम भइरहेका भन्ने गाइँगुइँ सुनिएको छ । त्यो हल्ला झूटो होस्।’
विनियोजन विधेयक संसदमा पेश भइसकेपछि मन्त्रालयगत बजेटमा हेरफेर गर्ने कुरालाई सुशासन र पारदर्शिता मान्न नसकिने उनको भनाइ छ ।
भर्खरै
लोकप्रिय
