काठमाडौं– वैदेशिक रोजगारीमा आकर्षक तलबको लोभ देखाई विभिन्न देश पठाइदिन्छु भन्दै ठगेको अभियोगमा पाँच जना पक्राउ परेका छन्।
केन्द्रीय प्रहरी समचारकक्षका अनुसार सिन्धुपाल्चोकका वाङ्दी लामा, रामेछापका ललितबहादुर तामाङ, धादिङकी सन्तोषी लामा, चन्द्रागिरि नगरपालिका–८ की रामदास महर्जन र काठमाडौं महानगरपालिका–१५ निवासी सरिब गिरीलाई वैदेशिक रोजगारी ठगीमा पक्राउ गरिएको हो।
अभियुक्त वाङ्दीले अजरबैजान पठाइदिन्छु भन्दै एकजनाबाट ५० हजार रुपैयाँ, ललितबहादुरले कोसोभो पठाइदिने भनेर दुई लाख ५० हजार रुपैयाँ, सन्तोषीले स्पेन पठाउने बहानामा एक जनाबाट १५ लाख रुपैयाँ, रामदासले युएईको रोजगारीको प्रलोभनमा सात जनाबाट ४५ लाख रुपैयाँ र सरिबले क्यानडाको लोभ देखाएर एक जनाबाट २० लाख रुपैयाँ ठगेका थिए ।
उनीहरूलाई काठमाडौँ उपत्यका अपराध अनुसन्धान कार्यालयबाट भएको प्रहरी टोलीले विभिन्न स्थानबाट हालै पक्राउ गरेको हो। कारबाहीका लागि सबै अभियुक्तलाई वैदेशिक रोजगार विभाग पुर्याइएको छ।
भर्खरै
लोकप्रिय
