आत्मदाह प्रयास गरेका युवकको अवस्था गम्भीर

काठमाडौँ – त्रिपुरेश्वरस्थित राहदानी विभागअगाडि आत्मदाह प्रयास गरेका युवकको वीर अस्पतालमा उपचार भइरहेको छ।

उपचारमा संलग्न चिकित्सकका अनुसार उनको अवस्था गम्भीर रहेको छ। आइसियुमा राखेर उनको उपचार गर्ने तयारी भइरहेको छ।

उपचारमा संलग्न डा. पिषूष दाहालका अनुसार युवकको अनुहार, घाँटी, छाती, दुवै हात तथा खुट्टाको केही भाग जलेको छ।

ती युवकले बिहीबार दिउँसो राहदानी विभागको तीन नम्बर गेटमा आत्मदाह प्रयास गरेका हुन्।

प्रहरीका अनुसार उनले शरीरमा आगो लगाउनुअघि पार्किङ गरेर राखेको उनको मोटरसाइकलमा नगर प्रहरीको टोलीले ह्वीललक गरेको थियो। त्यसपछि उनले आफ्नै शरीरमा पेट्रोल छर्केर आगो लगाएका थिए।