- संसदीय समितिहरू गठन भए लगत्तै निजी क्षेत्रका समस्यालाई पहिलो प्राथमिकतामा राखेर छलफल गरिने पराजुलीले बताए।
- एलडिसीबाट ग्राजुएसनपछि द्विपक्षीय वार्ता र स्वतन्त्र व्यापार सम्झौता आवश्यक पर्ने पराजुलीको धारणा छ।
- उनले राष्ट्रिय ध्वजावाहकको उपयोग गर्दै अन्तर्राष्ट्रिय स्तरको प्रदर्शनी गरेर निर्यात वृद्धि गर्न प्रोत्साहित गरे।
काठमाडौँ- राष्ट्रिय स्वतन्त्र पार्टीका सांसद गणेश पराजुलीले सन् २०२६ मा नेपाल कम विकसित मुलुक (एलडिसी) बाट स्तरोन्नति (ग्रेजुएट) भएपछि सिर्जना हुने चुनौतीलाई सामना गर्न निजी क्षेत्र र सरकारबीच बलियो सहकार्य हुनुपर्नेमा जोड दिएका छन् ।
‘एलडिसी ग्राजुएसनपछि तयारी पोशाकको निर्यात प्रवद्धन: चुनौती र अवसर’ विषयक अन्तरक्रिया कार्यक्रममा बोल्दै सांसद पराजुलीले निर्यात व्यापारलाई टिकाइराख्न द्विपक्षीय वार्ता र स्वतन्त्र व्यापार सम्झौता (एफटिए) मा जोड दिनुपर्ने बताएका हुन् ।
पराजुलीले संसदीय समितिहरू गठन हुनेबित्तिकै निजी क्षेत्रका समस्याहरूलाई पहिलो प्राथमिकतामा राखेर छलफल गरिने प्रतिवद्धता जनाए । नेपाली उत्पादनको ब्राण्डिङ र मार्केटिङका लागि छरिएर गरिने प्रयासभन्दा एकीकृत प्रयास प्रभावकारी हुने उनको तर्क थियो ।
सांसद पराजुलीले नेपाल उद्योग वाणिज्य महासंघ (एफएनसीसीआई), नेपाल उद्योग परिसंघ (सीएनआई), हस्तकला महासंघ लगायतका संस्थाहरूलाई अन्तर्राष्ट्रिय बजारमा संयुक्त रूपमा प्रदर्शनी आयोजना गर्न आग्रह गरे । सांसद पराजुलीले सुशासनको जगमा उभिएको वर्तमान सरकारले जनताका साना–साना समस्या समाधानमा ध्यान दिइरहेको दाबी गरे ।
उनले पेट्रोलियम पदार्थको आयातमा पूर्वाधार कर र भन्सार दरमा ५० प्रतिशत छुट दिने सरकारको पछिल्लो निर्णयले जनतालाई राहत पुग्ने विश्वास व्यक्त गए । साथै, वर्षौंसम्म कुर्नुपर्ने ड्राइभिङ लाइसेन्स अब २४ घण्टाभित्रै प्रिन्ट गर्ने व्यवस्था हुनु सुधारको एउटा सकारात्मक उदाहरण भएको उनको भनाइ थियो ।
उनले भने,‘मैले बाचा गरेको छु, संसदीय समिति गठन भएपछिको पहिलो बैठकमा निजी क्षेत्रका मुद्दाहरूमा छलफल हुनेछ । एलडिसी ग्राजुएसनसँग जोडिएका विषयमा निजी क्षेत्रले स्पष्ट मार्गचित्रसहितको निवेदन दिएमा हामी सम्बन्धित मन्त्रालयहरूसँग समन्वय गरेर ठोस निर्णयमा पुग्नेछौं । छिमेकी मुलुक भारतले वर्षमा दुई पटक समर र विन्टरका लागि ठूला अन्तर्राष्ट्रिय प्रदर्शनी आयोजना गरेर निर्यात बढाएको छ । हामी पनि राष्ट्रिय ध्वजावाहकको उपयोग गर्दै एउटै छातामुनि ठूलो स्तरको प्रदर्शनी गरौं, जसले गर्दा अन्तर्राष्ट्रिय खरिदकर्ताहरूलाई आकर्षित गर्न सकियोस् ।’
सदनमा हालै ‘नेपाल पर्यटन विधेयक’ टेबल भएको जानकारी दिँदै उनले यसमा आवश्यक संशोधन र सुधारका लागि अध्ययन गर्न निजी क्षेत्रलाई आग्रह गरे ।
उनले आगामी दुईदेखि तीन हप्ताभित्र संसदीय समितिहरूले पूर्णता पाउने र त्यसपछि आर्थिक तथा व्यापारिक मुद्दाहरूले गति लिने बताए ।
भर्खरै
लोकप्रिय
