सुस्तामा नेपालीलाई भारतीय सुरक्षकर्मीले हप्कीदप्की गरे, रक्षामन्त्रीको जवाफ चाहियोः हर्क

काठमाडौँ- श्रम संस्कृति पार्टीका अध्यक्ष हर्कराज राई (हर्क साम्पाङ)ले भारतीय सीमा सुरक्षा बलले सुस्तामा नेपाली नागरिकमाथि हप्कीदप्की गरेको विषयमा सरकारको ध्यानाकर्षण गराएका छन् ।

शुक्रबार प्रतिनिधि सभा बैठकमा बोल्दै उनले उक्त सुरक्षा बलले नेपाली नागरिकमाथि हप्कीदप्की गरेको भिडियो सार्वजनिक भएको उल्लेख गर्दै त्यसबारे रक्षामन्त्रीले तत्काल जवाफ दिनुपर्ने बताए ।

अध्यक्ष राईले नेपाली सेना भने सीमा क्षेत्रमा जानै नहुने के कमस खाएर बसेको छ भनि कटाक्ष समेत गरे । उनले सरकारले यदि नेपाली सेनाले सीमामा गएर अवलोकन गर्न नपाउने कुनै सन्धि सम्झौता भएको भए त्यसको पत्र पनि संसदलाई जानकारी गराउन सचेत गराए । अध्यक्ष राईले आफनो भूमिको लागि नेपाली नागरिकले मात्रै लडनुपर्ने दुखद अवस्था आउँदा पनि सरकारले चासो नदिएको भन्दै आक्रोश पनि व्यक्त गरे ।

उनले भने,‘म एउटा प्रश्न राख्न चाहन्छु-नेपाल सरकारको रक्षामन्त्री को हुुनुहन्छ ? उहाँलाई तपाईले बोलाई दिनुपर्दछ । उहाँलाई म प्रश्न सोध्न चाहन्छु–यो सुस्ता भन्ने ठाउँमा भारतीय पक्षको एसएसवी सशष्त्र सीमा बल जो छ । त्यो सीमा बल आएर नेपाली दाजुभाईलाई हप्कीदप्की गर्दै गरेको र नेपाली दाजुभाई चाँही आफनो भूमिको लागि निहत्था त्यहानिर लडदैभिडदै गरेको अवस्थाको भिडियोहरु सार्वजनिक भएका छन । त्यसतर्फ नेपाल सरकारले र रक्षामन्त्रीले अव प्रधानमन्त्रीजी त हुनुहुन्न । रक्षामन्त्री हुनुहुन्छ भने खोजेर तपाईले ल्याइ दिनु प¥यो । हामी प्रश्न सोध्न चाहन्छौ उहाँलाई । हाम्रो नेपाली सेना चाँही सिमानामा जानै नहुने त्यस्तो के कसम खाएर बसेको रहेछ ? नेपाल सरकारले सीमानमा चिहाउन पठाउन पनि नमिल्ने खालको, अवलोकन गर्न पनि नमिल्ने के करार गरेको रहेछ ? कि त त्यो करार पत्र त्यो सन्धि हामीलाई यहाँ देखाई दिनुप¥यो । सार्वभौम संसद, हामी सबै सार्वभौम सांसद साथीहरु जान्न चाहन्छौँ, बुझन चाहन्छौँ । सूचनाको हक संविधानमा छ । हामीलाई त्यो विषयमा जानकारी होस् । अन्यथा सुरक्षा विनाको खुला सीमाना जस्ले पनि मिच्छ ।’

अध्यक्ष राईले संविधानले सूचनाको हकको व्यवस्था गरेकाले उक्त विषयमा सरकारले संसदलाई यथार्थ कुरा जानकारी गराउनुपर्ने बताए ।