- चितवनमा बाढीले रत्ननगरको मौरीपालन व्यवसायमा करिब ६० लाख रुपैयाँ बराबरको प्रारम्भिक क्षति पुर्याएको छ।
- मनिखोला र लालपर्सा क्षेत्रमा बाढीले मौरीका ६८५ घार प्रभावित हुँदा अधिकांश मौरीगोला नष्ट भएको छ।
- किसानहरूले मह उत्पादन गर्न नसक्दा थप आर्थिक नोक्सानी भोग्नुपरेको कृषि विकास शाखाले जनाएको छ।
नारायणगढ (चितवन)- लगातारको वर्षापछि आएको बाढीले चितवनको रत्ननगर क्षेत्रमा मौरीपालन व्यवसायमा ठूलो क्षति पुर्याएको छ ।
नगरपालिकाको मनिखोला र लालपर्सा क्षेत्रमा चरनका लागि राखिएका मौरीका घारहरू बाढीले बगाउँदा र मौरीका गोलाहरू नष्ट हुँदा करिब ६० लाख रुपैयाँ बराबरको प्रारम्भिक क्षति भएको अनुमान गरिएको छ ।
रत्ननगर नगरपालिकाको कृषि विकास शाखाका प्रमुख प्रवीण लामाका अनुसार रत्ननगर–११ को पञ्चकन्या सामुदायिक वन क्षेत्रमा पर्ने मनिखोला र रत्ननगर–९ को लालपर्सामा राखिएका मौरीका घारहरू सोमबारको बाढीले बगाएको र मौरीका गोलाहरू नष्ट गरेको हो ।
अधिकांश घारबाट मह निकाल्ने समय भइसकेकाले किसानलाई थप आर्थिक नोक्सानी भएको लामाले बताए ।
मनिखोला क्षेत्रमा रत्ननगर–१२ का शङ्कर भट्टका २५० घार, रत्ननगर–४ का रोशन विकका ७० घार र भरतपुर–१४ का दिनेश ढकालका ९५ घार गरी जम्मा ४१५ घार प्रभावित भएका छन् ।
यस क्षेत्रमा केही घारहरू सुरक्षित अवस्थामा फेला पर्ने सम्भावना भए पनि अधिकांश मौरीका गोलाहरू भने नष्ट भइसकेको लामाको भनाइ छ ।
त्यसैगरी लालपर्सा क्षेत्रमा खैरहनीका लोकप्रसाद पराजुलीका ९० घार, रत्ननगर–४का दीपक थापाका ९० घार र रत्ननगर–३ का एकबहादुर गुरुङका ९० घार गरी २७० घार प्रभावित भएका छन् ।
तीमध्ये करिब २५० घार बाढीले पूर्ण रूपमा बगाएको र केही घार मात्र फेला पारेर सुरक्षित ठाउँमा सारिएको छ ।
पानीको बहाव उच्च भएकाले सबै घार भएको ठाउँमा पुगेर यकिन विवरण सङ्कलन गर्न अझै कठिनाइ भइरहेको कृषि शाखाले जनाएको छ ।
एउटा घारको औसत मूल्य करिब १० हजार रुपैयाँ पर्ने र अधिकांश घारमा मह निकाल्ने समय भएकाले प्रतिघार चारदेखि पाँच किलोग्रामसम्म मह उत्पादन हुने अवस्थामा रहेको लामाले जानकारी दिए ।
घारसँगै मौरीगोला र उत्पादन हुन लागेको महसमेत नष्ट हुँदा किसानलाई प्रारम्भिक रूपमा कम्तीमा ६० लाख रुपैयाँ बराबरको क्षति भएको हो । नगरपालिकाले प्रभावित क्षेत्रको थप स्थलगत अनुगमन गरी विस्तृत क्षतिको विवरण सङ्कलन गरिरहेको छ ।
भर्खरै
लोकप्रिय
