- विजयकुमार चौधरीले मलेसियाको वैदेशिक रोजगारी छोडेर स्वदेशमा माछापालन व्यवसाय गर्दै राष्ट्रिय पुरस्कार प्राप्त गरेका छन्।
- राष्ट्रपति रामचन्द्र पौडेलले उनलाई राष्ट्रिय उत्कृष्ट कृषक पुरस्कारले सम्मानित गर्दा चाैधरीको कृषि पेसाप्रतिको हौसला बढेको छ।
- चौधरीले आफ्नो व्यवसाय विस्तार गरी थप पाँच बिघा जमिन भाडामा लिएर माछा उत्पादन बढाउने योजना बनाएका छन्।
महेन्द्रनगर- कञ्चनपुरको लालझाडी गाउँपालिका–४ का विजयकुमार चौधरी सात वर्षअघि वैदेशिक रोजगारीका सिलसिलामा मलेसिया पुगेका थिए ।
मलेसियाको चर्को गर्मीमा तीन वर्षसम्म दैनिक मजदुरी गर्दा उनको मासिक कमाइ करिब ३५ हजार रुपैयाँ मात्र थियो । विदेशमा श्रम बेचेर स्वदेश फर्किएका विजय अहिले भने कसैको मातहतमा होइन, आफ्नै देशको माटोमा सफल उद्यमीका रूपमा स्थापित भएका छन् ।
मलेसियाबाट फर्केपछि माछापालन व्यवसायमा होमिएका चौधरी हालै राष्ट्रिय स्तरमा सम्मानित भएका छन् ।
गत जेठ १५ गते कृषि, वन तथा पर्यावरण मन्त्रालयको छनौटमा परी उनलाई राष्ट्रपति रामचन्द्र पौडेलले ‘राष्ट्रिय उत्कृष्ट कृषक पुरस्कार’ बाट पुरस्कृत गरे ।
मन्त्रालयले सातै प्रदेशबाट उत्कृष्ट दुई-दुई जना गरी कुल १४ जना कृषकलाई सम्मानित गरेको थियो । दुई लाख रुपैयाँ राशिको पुरस्कार पाएपछि हर्षित भएका चौधरीले यो सम्मानले आफ्नो कृषि पेसाप्रतिको जाँगर र हौसला झन् बढाएको बताए।
“राष्ट्रपतिबाट सम्मान पाउँदा हौसला थपिएको छ । अब अरू युवाहरूलाई पनि कृषि र उत्पादनमुखी काममा आकर्षित गर्ने गरी व्यवसाय विस्तार गर्ने योजनामा छु,” चौधरीले उत्साहका साथ भने ।
विगत सात वर्षदेखि कञ्चनपुरको सिकलपट्टी जाइमा तीन बिघा जमिनमा माछा पोखरी बनाएर मत्स्य उत्पादन गरिरहेका चौधरीले निकट भविष्यमै आफ्नो व्यवसायलाई अझ बढाउने तयारी गरिसकेका छन् ।
उनले थप पाँच बिघा जमिन भाडामा लिएर माछा उत्पादन बढाउने गरी काम अघि बढिसकेको जानकारी दिए।
आफूले उत्पादन गरेको माछा स्थानीय झलारी, बेलौरी, वाणी र आसपासका बजारमा सजिलै खपत भइरहेको चौधरी बताउँछन् । तथापि, स्वदेशी माछा उत्पादनको दिगो बजारीकरणका लागि सरकारले उचित वातावरण मिलाइदिनुपर्ने उनको माग छ ।
भारत लगायतका अन्य मुलुकबाट आयात हुने माछामा रोक लगाएर सरकारले स्वदेशी उत्पादनलाई बजारको सुनिश्चितता गरिदिनुपर्ने उनको भनाइ छ ।
भर्खरै
लोकप्रिय
