- पृथ्वीराजमार्गको तनहुँ खण्डमा एम्बुलेन्स र मिनी ट्रक ठोक्किँदा सात जना व्यक्तिहरू घाइते भएका छन्।
- दुर्घटनामा एम्बुलेन्सका छ जना र मिनी ट्रक चालक घाइते हुँदा एक जनाको अवस्था गम्भीर छ।
- घाइतेहरूको उपचार बेलचौतारास्थित जिपी कोइराला श्वासप्रश्वास उपचार केन्द्रमा भइरहेको छ।
तनहुँ- पृथ्वीराजमार्गअन्तर्गत तनहुँको म्याग्दे गाउँपालिका- ६ मनहरीमा आज बिहान एम्बुलेन्स र मिनी ट्रक एकापसमा ठोक्किँदा सात जना घाइते भएका छन् ।
पोखराबाट दमौलीतर्फ आउँदै गरेको ग१ख ५६५९ नम्बरको मिनी ट्रक र विपरीत दिशाबाट जाँदै गरेको लु.प्र.०१-००१ झ ००४६ नम्बरको एम्बुलेन्स ठोक्किँदा सात जना घाइते भएका हुन् ।
दुर्घटनामा एम्बुलेन्समा सवार छ जना र मिनी ट्रक चालक गरी सात जना घाइते भएको जिल्ला प्रहरी कार्यालय तनहुँका प्रहरी निरीक्षक दीपककुमार कार्कीले जानकारी दिए । घाइतेमध्ये एक जनाको अवस्था गम्भीर छ ।
दुर्घटनामा एम्बुलेन्स चालक रोल्पाको थवाङ गाउँपालिका- २ बस्ने २४ वर्षीय कुशल परियार, सोही ठाउँ बस्ने ६१ वर्षीया जुनराखी बुढा मगर, २५ वर्षीया अन्जना बुढा मगर, तीन वर्षीय युवान बुढा मगर, पूर्वी रुकुम भुमे गाउँपालिका- ७ बस्ने ३६ वर्षीया चिजामाया घर्ती, रोल्पाको थवाङ गाउँपालिका–२ बस्ने ६० वर्षीया धनप्रसाद बुढा मगर घाइते भएका छन् । घाइतेमध्ये २५ वर्षीया अन्जना बुढा मगरको अवस्था गम्भीर रहेको प्रहरी निरीक्षक कार्कीले बताए ।
घाइतेहरुको बेलचौतारास्थित जिपी कोइराला श्वासप्रश्वास उपचार केन्द्रमा उपचार भइरहेको छ ।
भर्खरै
लोकप्रिय
