- अख्तियार दुरुपयोग अनुसन्धान आयोगले ई–पासपोर्ट छपाइ प्रकरणमा कांग्रेस नेतृ आरजु राणालाई बयानका लागि बोलाएको छ।
- देउवा दम्पत्ति सिंगापुरमा भएको कारण आयोगले राणाको घरमा सूचना टाँस गरी बयानको म्याद दिएको हो।
- जर्मन कम्पनीलाई राजनीतिक पहुँचको आरोपसँग जोडेर पनि बयानका लागि बोलाइएको छ।
काठमाडौँ- अख्तियार दुरुपयोग अनुसन्धान आयोगले ई–पासपोर्ट छपाइ प्रकरण अनुसन्धानका लागि पूर्वपरराष्ट्रमन्त्री तथा कांग्रेस नेतृ आरजु राणा देउवालाई बयानका लागि म्याद तामेल गरेको छ।
आयोगले राणाको घर ठेगानामा सूचना टाँस गरेर म्याद तामेल गरेको हो।
आयोगले गत मंगलबार देउवाको भग्नावशेष निवासमा आरजु राणाको नाममा तीन दिनभित्र बयानका लागि उपस्थित हुनका लागि म्याद तामेल गरेको हो।
देउवा दम्पत्ति उपचारका लागि भन्दै ४ महिना अघि सिंगापुर गएका थिए। सिंगापुरबाट नेपाल नफर्केकाले राणाका घर ठेगानामा आयोगले म्याद तामेल गरेको हो।
उक्त ठेक्का प्रकरणमा आरजुको प्रत्यक्ष संलग्नता नदेखिए पनि परराष्ट्रमन्त्रीको हैसियतमा उनको पनि संलग्नता हुन सक्ने आशंकाका कारण आयोगले बयानमा बोलाएको हो। आयोगमा भएको कागजात केलाउँदा, गत वर्षको पासपोर्ट खरिद प्रक्रियामा उनले निर्णय गरेको देखिँदैन तर निर्देशन दिएको भन्ने आधारमा मात्रै बयानमा बोलाउन लागेको हो।
अख्तियारले सूचनामा भनेको छ- ‘यस आयोगमा परेको वादी नेपाल सरकार प्रतिवादी आरजु राणा देउवा समेत भएको राहदानी छपाई सम्बन्धी कार्यमा भ्रष्टाचारजन्य कसुर गरेको भन्ने उजुरीको अनुसन्धानको सिलसिलामा तपाईंसँग बयान लिनुपर्ने भएकोले यो सूचना बुझेको वा तपाईंको घरदैलोमा टाँस भएको मितिले बाटोको म्याद बाहेक ३ (तीन) दिनभित्र यस आयोगको महाशाखा नं. १२, कोठा नं. १२ टंगाल, काठमाडौँमा उपस्थित हुन आउनु होला, नआए कानून बमोजिम हुनेछ।’
जर्मनको विदेशी दुई कम्पनीलाई राजनीतिक पहुँचको आधारमा ठेक्का दिलाइएको आरोप लाग्दै आएको छ ।
आयोगले बिहीबारमात्रै जर्मनीको कम्पनीका आधिकारिक प्रतिनिधिलाई बयानका लागि बोलाएको छ। आयोगले बिहीबार सूचना जारी गर्दै ई–पासपोर्ट खरिद प्रकरणमा अनुसन्धानका लागि जर्मन कम्पनीको प्रतिनिधिलाई बयानका लागि बोलाएको छ।
भर्खरै
लोकप्रिय
