अन्तिम खेल अगावै पोर्चुगलसहित यी टिम नकआउटचरणमा

फिफा विश्वकपअन्तर्गत तीनवटा समूहका खेलहरू बाँकी रहँदा उक्त समूहमा रहेका इङ्ग्ल्यान्ड, पोर्चुगल, घाना र पाराग्वेले आफ्नो अन्तिम समूह खेल खेल्नुअघि नै विश्वकपको नकआउट चरणमा स्थान बनाएका छन्।

समूह ‘ए’देखि ‘आइ’सम्मका नतिजाले अन्तिम तीन समूह अर्थात ‘जे’, ‘के’, ‘एल’का खेलहरू बाँकी रहँदा त्यो समूहमा चार अंक भएका टिमहरूले अन्तिम खेल बाँकी रहँदै नकआउटमा स्थान बनाएका हुन्। अर्थात अब उनीहरूका लागि ४ अंक नकआउटका लागि पर्याप्त भएको हो।

जसका कारण यी चार टोलीले नकआउटमा स्थान बनाएका हुन्। समूह ‘एच’ मा उरुग्वे स्पेनसँग पराजित हुनु र केप भर्डे तथा साउदी अरेबियाबीच गोलरहित बराबरी हुनुका कारण यी चार टोलीको अघिल्लो चरणको यात्रा पक्का भएको हो।

समूह ‘आई’को विजेता बनेको फ्रान्सले अब अन्तिम ३२ मा स्विडेनसँग प्रतिस्पर्धा गर्नेछ। त्यसैगरी, दक्षिण अमेरिकी टोली पाराग्वे समूह ‘डी’ बाट अगाडि बढेपछि जर्मनीले अन्तिम ३२ मा पाराग्वेको सामना गर्ने भएको छ।

यससँगै विश्वकपको नकआउट चरणको तस्बिर क्रमशः स्पष्ट बन्दै गएको छ र अन्तिम समूह खेलहरूअघि नै केही टोलीहरूले आफ्नो स्थान सुरक्षित गर्न सफल भएका छन्।